US sumaklolo rin sa Pinas, 3.2 milyon bakuna ipinadala
MANILA, Philippines — Nakatanggap ang Pilipinas nitong Biyernes ng 1.6 milyong doses ng Janssen Covid-19 vaccine na gawa ng Johnson & Johnson’s na unang batch ng 3.2 milyong donasyon ng Estados Unidos sa pamamagitan ng COVAX Facility.
Nasa 1,606,600 doses ng Janssen vaccines ang dumating habang inaasahan na darating din nitong Sabado ang ikalawang batch ng kabuuang 3,213,200 doses.
“There will be another 1.6 million arriving imminently. So a total of 3.2 million doses donated by the US. This is part of the 80 million doses that the US is donating around the world this month,” ayon kay US Embassy Chargé d’Affaires John Law.
Idiniin ni Law na ito ay dahil ang Pilipinas ay isa sa pinakamatagal nang kaalyado ng US sa Timog Silangang Asya at nais ng Washintong DC na gawin ang lahat ng paraan para matulungan ito.
Sinabi ni National Task Force Against Covid-19 chief implementer and vaccine czar, Secretary Carlito Galvez Jr. na inaasahang darating ang ikalawang batch dakong alas-4:30 kahapon ng hapon.
Pantay na ipamamahagi ang Janssen vaccine sa lahat ng rehiyon sa bansa na may minimum na 100,000 doses kada rehiyon.
May ilang rehiyon na makatatanggap ng higit sa 100,000 doses kabilang ang Bangsamoro Autonomous Region in Muslim Mindanao (BARMM), Central Luzon, Calabarzon, Bicol, Central Visayas, Eastern Visayas, at Zamboanga Peninsula.
Inilarawan ni Galvez na ‘game changer’ ang Janssen vaccines dahil sa pagiging single dose at naisailalim sa testing laban sa UK, Brazilian, at South African variant habang inaasahan na mabisa rin laban sa Delta (Indian) variant.
- Latest
