P4.5 trilyon national budget aprub na sa bicam
MANILA, Philippines — Aprubado na ng bicameral conference committee ng dalawang kapulungan ng kongreso ang panukalang P4.5 trillion 2021 national budget.
Ayon sa tanggapan ni Sen. Sonny Angara, chairman ng Senate Committee on Finance na naging mabilis ang pag-apruba sa Bicam kung saan alas-10 ng umaga nang mag-convene at natapos ng alas 10:14 ng umaga.
Aabot sa P82.5 bilyon ang budget ng gobyerno sa pambili ng bakuna laban sa COVID-19 at mga kaugnay na gastusin tulad ng distribusyon, storage at transportasyon ng bakuna.
Kapag naisabatas ang latag ng pambansang budget na inaprubahan at kapag napalawig din ang Bayanihan to Recover as One Act o Bayanihan 2, sa nasabing halaga ang P72.5 bilyon ay ipapaloob sa 2021 national budget.
Sa nasabi ring halaga ang P2.5 bilyon ay programmed o garantisado nang may pondo at ila-lagak sa Department of Health (DOH) habang ang P70 bilyon ay unprogrammed o depende pa sa availability ng pondo.
Paliwanag pa ni Angara, ginarantiyahan naman ng Malakanyang na mapopondohan ang sinasabing unprogrammed appropriations at maaari namang kunin ang pondo sa utang o sa pagbebenta ng assets ng pamahalaan.
Samantala, ang bukod na P8 bilyon ay mula sa budget sa pambili ng bakuna base sa Bayanihan 2 na mag-e-expire sa Dis-yembre 19 at papalawigin pa ng kongreso hanggang sa Marso o Hunyo 2021.
Kasama rin sa inaprubahan ang P23 bilyon para sa pagtugon ng mga kalamidad at mga nasalanta ng mga bagyo. — Joy Cantos
- Latest