Gobyerno uutang pa ng P436 bilyon vs COVID-19
MANILA, Philippines — Binabalak ng gobyerno na mangalap pa ng mahigit P436 bilyon o nasa $8.72 bilyong utang mula sa foreign sources para tugunan ang problemang dala ng COVID-19 at tustusan ang pagbangon ng ekonomiya.
Sinabi ni Finance Assistant Secretary Antonio Lambino II na ang P436 bilyong target sa foreign loan financing ay para sa buong taon.
Aminado si Lambino na lumaki ang utang ng Pilipinas ngayong taon dahil hindi naman nakasama sa pambansang budget ang mga ginagastos sa COVID-19.
Ipinunto rin ni Lambino na hindi lamang ang Pilipinas ang umuutang ngayon ng malaki.
“Medyo lumaki ang utang natin ngayong taon dahil nilalabanan natin itong COVID-19 hindi naman po natin na-budget itong laban na ito dahil nag-ulat naman ang buong mundo dito sa pandemiya ng COVID-19,” sabi ni Lambino.
Idinagdag ni Lambino na maganda ang standing ng Pilipinas kaya nabibigyan ng mataas na credit rating.
Samantala, inaasahan ng mga economic managers na bababa ang revenue collection ngayong taon.
Noong Hunyo 11 ay umaabot na sa $6.4 bilyon ang nautang ng gobyerno mula sa World Bank, AIIB at Asian Development Bank.
- Latest