Ex-Army nag-amok: 5 patay
CAVITE, Philippines — Lima katao ang patay kabilang ang isang dating sundalo na nagbaril sa sarili makaraang mag-amok habang dalawang nagrespondeng pulis ang sugatan sa naganap na karahasan dahil sa paninira sa Gen. Trias City kahapon ng umaga.
Kinilala ang mga nasawi na sina Murharma Bautista, 59, na dead-on-the-spot sa insidente; Alberto Sorio, 57, retiradong miyembro ng Philippine Army (PA); Recto Marbit, 47, tricycle driver at Pilar Bacaoco, 34, may-asawa; pawang residente ng Purok 6 Sitio Carapiohan, Santiago, Gen. Trias City na nasawi habang ginagamot sa magkahiwalay na ospital dahil sa mga tama ng bala sa kanilang katawan.
Dead-on-the-spot naman ang suspek na si Junny Palacio, may-asawa, dating miyembro ng Philippine Army at residente ng Purok 6, Sitio Carapiohan, Santiago Gen. Trias City, Cavite.
Personal namang dinalaw ni PLt. Col Marlo Solero, hepe ng Gen. Trias City Police ang mga sugatang tauhan na sina P/CMS Zaldy Espiritu at P/SMS Reynante Tan; na tinamaan ng mga bala sa kanang kamay at tiyan.
Sa ulat ni P/SSgt Armine Matro ng Gen. Trias City Police Station, alas-8:45 ng umaga nang maganap ang insidente sa Purok 6 Sitio Carapiohan, Brgy. Santiago kung saan armado ng kalibre 38 na baril si Palacio at hinanap nito ang anim katao na umano’y naninira sa kanyang pagkatao bilang isang contractor.
Una niyang nakita sina Bautista at Sorio habang nag-uusap sa isang palengke sa lugar at matapos kausapin ay walang sabi-sabing pinagbabaril.
Naabutan naman niya si Marbit sa pilahan ng mga tricycle habang naghihintay ng pasahero saka nito binaril habang pinuntahan din niya sa kanilang bahay si Bacaoco at doon niya pinaputukan.
Dahil dito, rumesponde ang mga miyembro ng Gen. Trias CPS at naabutan nila ang suspek pero agad silang pinaputukan na ikinasugat nina Espiritu at Tan.
Tinangkang tumakas ng suspek at nang makorner ay sinabihang sumuko subalit itinutok ang baril sa kanyang sentido at nagbaril.
- Latest
