State of calamity idineklara ni Duterte sa Calabarzon
Sa pagsabog ng Taal
MANILA, Philippines — Idineklara na ni Pangulong Rodrigo Duterte ang state of calamity sa buong Calabarzon (Region 4-A) dahil sa nangyaring pagputok ng Taal Volcano noong Enero.
Layunin ng Proclamation 906 na nilagdaan ni Duterte noong Pebrero 21, na mapabilis ang rescue, relief at rehabilitation efforts ng gobyerno at ng pribadong sektor.
Dahil sa deklarasyon, magkakaroon ng price control sa mga pangunahing bilihin sa mga apektadong lugar.
Tatagal ng isang taon ang state of calamity maliban na lamang kung agad din itong babawiin.
Nauna rito, inaprubahan ng Pangulo noong Pebrero 4 ang panukala na bigyan ng nasa 5,448 housing units ang mga pamilyang nasa loob ng pitong kilometrong radius danger zone na malapit sa Taal Volcano.
Base sa records, nasa 129,171 pamilya o 483,389 indibiduwal sa Batangas, Quezon, Laguna at Cavite ang naapektuhan nang pagsabog ng Taal.
Patuloy namang nasa alert level 2 status ang naturang bulkan at ipinaiiral ang 7 km permanent danger zone sa paligid nito.
- Latest
