Kabayanihan ng SAF 44 ginunita
MANILA, Philippines — Ginunita kahapon ng Philippine National Police ang kabayanihan ng 44 na Special Action Force (SAF) commandos na nagbuwis ng buhay sa pag-neutralisa sa most wanted na Jemaah Islamiyah (JI) terrorist na si Zulkipli bin Hir sa Mamasapano, Maguindanao noong Enero 25, 2015 o may limang taon na ang nakalilipas.
Sa kanyang mensahe sa naturang okasyon, sinabi ni PNP Chief Police Gen. Archie Gamboa na ang kagitingan ng mga bayaning commandos ay patunay lamang na sa tuwina’y gagawin ng kapulisan ang kanilang makakaya, kabayanihan upang bigyang proteksyon ang publiko.
Sinabi naman ni PNP Deputy Chief for Operations Police Lt. Gen. Guillermo Eleazar sa mga opisyal at miyembro ng SAF na ikuwento sa kanilang mga anak at iba pang miyembro ng pamilya ang kagitingan ng SAF 44.
Samantala, sa Malakanyang, nagpahayag ito ng pag-asa na makakamit pa rin ng pamilya ng 44 na SAF ang hustisya.
Ayon pa kay Presidential Spokesperson Salvador Panelo, patuloy na nagdarasal ang Malacañang na magkakaroon ng katahimikan ang kaluluwa ng mga miyembro ng PNP na nagbuwis ng buhay sa insidente limang taon na ang nakakaraan.
Sinabi rin ni Panelo na dapat magsilbing aral ang mga naging kamalian upang hindi na maulit pa ang insidente sa tinaguriang SAF 44.
- Latest