Singil sa kuryente tataas ngayong Disyembre

MANILA, Philippines — Tataas ng P0.3044 kada kilowatt hour (kwh) ang singil sa kuryente ng Manila Electric Company (Meralco) ngayong Disyembre.

Nabatid na ang naturang pagtaas ng singil ay katumbas ng P60.88 na dagdag sa bayarin ng mga tahanang kumukonsumo ng 200 kwh kada buwan; P91.32 para sa nakakakonsumo ng 300 kwh kada buwan; P121.76 sa nakakagamit ng 400 kwh at P152.20 naman sa nakakagamit ng 500 kwh kada buwan.

“This is the third monthly increase in Meralco rates after the upward adjustments in October and November,” anang Meralco.

“The overall rate for a typical household consuming 200 kWh increased to P9.8623 per kWh this December from last month’s P9.5579 per kWh. The adjustment of P0.3044 per kWh will mean an increase of around P61 in the typical household’s total electricity bill,” dagdag pa nito.

Ipinaliwanag ng Meralco na ang pagtataas ng electricity rates na mahigit 30 sentimo/kwh ngayong December bill ay dulot ng pagmahal ng presyo ng kuryente sa spot market dahil sa dalawang ulit na pagtataas ng yellow alert sa Luzon sa nakalipas na buwan at mas mataas na generation charges.

Tumaas din umano ang presyo ng power mula sa Independent Power Producers (IPPs) ng P0.1106/kWh at P0.0987/kWh naman mula sa Power Supply Agreements (PSAs).

Kaugnay nito, patuloy namang hinihikayat ng Meralco ang kanilang mga kostumer na magtipid ng kuryente.