Pagtatapon ng mga tiwaling pulis sa Mindanao pinatitigil

MANILA, Philippines — Dapat nang itigil ng Philippine National Police (PNP)  ang pagpapatapon ng mga tiwaling pulis sa Mindanao.

Ayon kay Sen. Richard Gordon, kung may kasalanan, dapat tanggalin sa puwesto ang mga tiwaling pulis at hindi dapat ilipat lamang sa ibang lugar.

Sinabi ni Gordon na hindi makatarungan na sa magandang lugar katulad ng Mindanao dinadala ang mga nagkakasalang pulis.

“It is very, very unfair to Mindanao. It is a beautiful place but it is becoming dirty dahil lagi na lang doon tinatapon pag may kaso. Itinatapon niyo lang sila sa Mindanao, you are perpetrating the scalawags in uniform by doing that,” sabi ni Gordon.

Anya, nasasayang din ang pera ng gobyerno dahil kinakailangan pang i-monitor ang mga pulis na itinatapon sa Mindanao sa halip na inaalis sila sa hanay ng PNP.

Aminado naman sina Senators Panfilo Lacson at Ronaldo dela Rosa na kapwa naging PNP chief na nakagawian nang ipadala sa Mindanao ang mga tiwaling pulis upang malayo sa kanilang mga ilegal na aktibidad.

Pero sinabi ni Gordon na kung may nagkasala, dapat ay imbestigahan at kasuhan.