Bus prexy nagpasaklolo sa SC
Police brutality kinondena
MANILA, Philippines — Nagpapasaklolo ang pangulo ng Vallacar Bus Transit, sa Korte Suprema sa pamamagitan ng paghahain ng writ of amparo upang payagan silang makalabas at makapasok sa kanilang opisina sa Ceres Compound, Purok Hinaya Mansilingan Bacolod City.
Ito’y matapos na pasukin ng may 300 pulis sa pangunguna ni Brig. Gen. Rene Pamuspusan ang compound at pagbawalan silang papasukin at palabasin simula pa noong Agosto 8.
Ayon kay Vallacar president Roy Yanson, maituturing itong police brutality dahil wala namang gulo na dapat panghimasukan ang mga pulis.
Nabatid na sapilitan pa ring pinasok ng mga pulis ang lugar sa kabila ng kautusan ni PNP Chief Oscar Albayalde noong August 8 kay Pamuspusan, PNP CIDG chief Amador Corpus at mga tao nito, Police Col. Benliner Capili ng Bacolod CIDG at Bacolod City chief Police Col. Henry Binas na huwag makialam sa umano’y intra-corporate dispute sa mga board members ng Yanson Group of Bus Companies.
Sa apela ni Roy, sinabi nito na ang kanyang mga kapatid na sina Ricky Yanson, Jr., Celina at Emily at kanilang pamilya ay nasa Mansalingan compound. Inabisuhan umano ng mga pulis ang bus security na kailangan na humingi muna ng pahintulot sa provincial director ng PNP bago makalabas.
“Why would we even ask permission from the Provincial director when there is no legal order directing them to take over our premises and stop our operations. We are a private firm. It is our right to allow or disallow entry or exit of our own company premises,” ani Roy.
Kinuwestiyon din ni Roy ang paggamit ng police powers sa isyu laban sa bus management. Wala namang gulo o karahasang nagaganap sa lugar kaya’t walang dahilan upang panghimasukan ng pulis.
- Latest
