2,838 pulis magsisilbing BEIs
MANILA, Philippines — Handa na ang 2,838 pulis sa bansa upang magsilbi bilang Board of Election Inspectors (BEIs) ngayong midterm elections.
Ayon kay Department of Interior and Local Government (DILG) Sec. Eduardo Año, ang mga naturang pulis ang siyang mangangasiwa sa eleksiyon, sakaling walang gurong magsisilbi sa halalang idaraos ngayong araw.
Ayon kay Año, dapat matuloy ang halalan sa lahat ng mga presinto sa buong bansa kaya naka-standby ang mga pulis.
“…Elections must proceed in every precinct in the country and the PNP (Philippine National Police) is ready to be called to duty by the Comelec if there are no available teachers to serve in some precincts,” pahayag ni Año.
Sinabi rin ni Ano sa PNP na tiyaking hindi magiging hadlang ang anumang insidente na may kaugnayan sa peace and order at makaboto ang lahat ng mga Filipino.
“Our men and women of the PNP are ready to do their duty under the law. They have already undergone training by the Comelec for this contigency and they are on stand-by should their service required,” pahayag pa ni Año.
Sa 2,838 police officers, ay 1,032 ang itatalaga sa Bangsamoro Autonomous Region in Muslim Mindanao (BARMM) dahil sa mga posibleng election-related violence sa rehiyon.
Sa Police Regional Office (PRO)-10, nasa 415 pulis ang handa para maging BEI; PRO4A (363); PRO13 (231); PRO5 (201); PRO11 (175); at PRO9 (136).
Sa Luzon, ang National Capital Region Police Office ay mayroong 24 BEI cops, habang 50 sa PRO1; 20 sa PRO2, at 96 sa PRO3.
Sa Visayas, nasa 35 BEI ang itatalaga sa PRO6 at 43 naman sa PRO12 na nasa Mindanao, habang 17 BEI cops naman ang ipapakalat sa PRO Cordillera (PROCOR).
Sa ngayon nasa full alert status na ang PNP kung saan 149,830 police officers nationwide ang nakatutok sa halalan.
- Latest
