Ex-Laguna Gov. ER Ejercito kulong sa graft
MANILA, Philippines — Hinatulan ng guilty ng Sandiganbayan Fourth Division ang aktor at dating gobernador ng Laguna na si Emilio Ramon “ER” Ejercito dahil sa kasong graft.
Sa desisyong inilabas ng anti-graft court, nag-ugat ang kaso ni Ejercito sa umano’y maanomalyang insurance deal para sa mga turista at boatmen na pinasok nito noong kasalukuyan pa itong alkalde sa bayan ng Pagsanjan, Laguna.
Si Ejercito ay nagsilbing Mayor sa Pagsanjan mula 2001 hanggang 2010 bago ito naluklok sa puwesto bilang gobernador sa Laguna.
Inakusahan si Ejercito at co-respondents nito ng pamemeke ng Memorandum of Agreement kasabwat ang First Rapids Care Ventures (FRCV) para sa proteksyon sa aksidente at pinansyal na tulong para sa mga turista at boatmen sa Pagsanjan na kilala sa pamosong ‘waterfalls’ o talon nito.
Dahil dito, sinentensiyahan si Ejercito ng anim hanggang walong taong pagkakabilanggo.
Si Ejercito ay pamangkin ni dating Pangulo at ngayo’y Manila Mayor Joseph “Erap” Estrada.
Samantala, ipinag-utos din ng Sandiganbayan ang pagpapataw ng perpetual disqualification o ang hindi na pagpapahintulot kay Ejercito na humawak pa ng anumang posisyon sa gobyerno.
Kanselado na rin ang civil service eligibility ni Ejercito maging ang kaniyang retirement benefits.
Si Ejercito ay tumatakbo muli bilang gobernador sa kanilang lalawigan.
Naglaan naman ang Sandiganbayan ng P30,000 piyansa para sa pansamantalang kalayaan nito.
Samantala maaari namang iapela ni Ejercito ang desisyon habang ipinupursige ang ‘post conviction remedies’ sa ibinabang hatol laban dito.
- Latest
