Comelec may ultimatum sa senatorial candidates
MANILA, Philippines — Hanggang ngayon na lang ang ibinigay na ultimatum ng Commission on Elections (Comelec) sa mga senatorial candidates para baklasin ang kanilang mga campaign materials.
Sa ginanap na Kapihan sa Manila Bay, sinabi ni Comelec Spokesman James Jimenez, sapat na ang binigay nilang panahon sa mga kandidato upang magkabit ng kani-kanilang mga posters kaya’t tama lamang sila mismo ang magtanggal ng kanilang mga tarpaulin sa mga bawal na lugar.
Ilan sa mga common areas ay matatagpuan sa paligid ng public markets at park habang ipinagbabawal naman ang campaign posters sa footbridges, puno at poste.
“Hindi nila puwedeng sabihin na hindi ako ang nagkabit niyan kasi sino ba ang nag-bebenipisyo riyan?,” ani Jimenez.
Sinabi pa ni Jimenez na magpapakalat din sila ng tauhan simula bukas upang tanggalin ang mga illegal campaign posters ng mga kandidato. Kailangan na sundin ang ipinatutupad ng Comelec na 2’ x 3’.
Samantala, hindi na kailangan pang magdala ng identification card ang isang botante upang makaboto.
“Kung ang pangalan nyo ay nasa labas at wala sa loob, hindi kayo pabobotohin. Ngayon kung wala sa labas pero nasa loob, maaaring makaboto,” ani Jimenez.
Hihingan lamang ng ID kung hindi babasahin ng biometrics ang identity ng isang botante.
Nagsimula na ang kampanya sa senatorial race noong Martes habang sa Marso 29 naman sa local.
- Latest