Hustisya kay Batocabe tiniyak ng Malacañang

MANILA, Philippines — Tiniyak ng Malacañang na tututukan ng gobyerno ang pagbibigay ng katarungan sa pagkakapatay kina Ako Bicol partylist Rep. Rodel Batocabe sa mismong araw ng wedding anniversary nito at bodyguard nito kamakailan sa Daraga, Albay.

Sinabi ni Presidential Communications Secretary Martin Andanar na ipatutupad ng  pamahalaan ang “full hand of the law” upang maresolba ang extra judicial killing na sinapit ni Congressman Batocabe.

Ayon kay Andanar, nakikiramay ang buong pamahalaan sa pamilya ni Batocabe na dapat sana ay nagsasaya ngayong kapaskuhan tulad ng ibang pamilya kaya naman maging ang Department of Justice, National Bureau of Investigation at iba pang ahensiya ng pamahalaan na puwedeng tumulong ay kumikilos na upang mahuli ang mga suspek sa krimen.

Sa kasalukuyan ay umabot na sa P40 million ang ambag-ambag ng mga kasamahang kongresista ni Batocabe bilang reward sa makapagtuturo sa mga suspect para sa mas mabilis na pagresolba sa kaso.

Samantala, kinumpirma ni Andanar na nakatakda sana silang magkita ni Batocabe at iba pang Partylist Representative pagkatapos ng holiday seasons para pag-usapan ang ilang mga issues.