Walang terminal fee sa PITX

MANILA, Philippines — Nilinaw ng Department of Transportation (DOTr) na walang babayaran na terminal fee ang mga pasahero na gagamit ng Parañaque Integrated Terminal Exchange (PITX).

Sinabi ni Transportation Usec. Mark de Leon, libre ang paggamit ng mga pasahero sa nasabing terminal na tinaguriang kauna-unahang landport sa bansa, sa kabila ng disenyo at istilo nito na mistulang paliparan.

Kahapon ay inutos ni Pangulong Duterte ang paggamit ng PITX sa lahat ng pampublikong sasakyan matapos pangunahan ang inagurasyon nito.

Na-impress din ang Pangulong Duterte sa mo­dernong landport na itinayo ng DoTr bilang bahagi ng Build, Build, Build program ng pamahalaan katuwang ang Megawide.

Inatasan ng Pangulo ang DoTr na siguruhin ang road worthiness ng lahat ng sasakyan sa PITX para sa kapakanan ng mga pasahero.