PNP zero ang suporta kay Trillanes
Walang nagpakalbo – Albayalde
MANILA, Philippines — Walang nagpakalbo sa Philippine National Police (PNP) bilang pagpapakita ng suporta kay Sen. Antonio Trillanes IV kaugnay ng umiinit na isyu sa amnestiya nito na binawi ni Pangulong Duterte.
Inihayag ito kahapon ni PNP Chief P/Director General Oscar Albayalde kaugnay ng ibinunyag ng Pangulo sa umano’y isyu ng paksyon sa hanay ng PNP at AFP sa pagsuporta kay Trillanes.
Ayon sa Pangulo, nagpakalbo ang mga sundalong kumokontra laban sa kaniya na hinamon nitong gawin na ang pag-aaklas.
Sinabi ni Albayalde na zero o walang makukuhang suporta si Trillanes sa hanay ng mga opisyal at tinatayang nasa 190,000 puwersa ng PNP.
“Wala. I have repeatedly said that zero sa amin ‘yan sa PNP. Wala tayong namo-monitor kahit na little support, in any way, dito kay Senator Trillanes,” sabi ni Albayalde.
Sa halip , pabiro pang sinabi ni Albayalde na kung meron mang opisyal ng PNP na nagpakalbo, ang ibig lang sabihin nito ay gusto ng opisyal na maging PNP Chief, katulad niya at maging ni dating PNP chief ret. P/Director General Ronald “Bato” Dela Rosa na walang buhok.
Nilinaw ni Albayalde na walang kahit na anong reklamo laban sa administrasyon ni Pangulong Duterte sa hanay ng mga aktibong pulis at maging sa mga retiradong opisyal.
Muli rin nitong iginiit na hindi kailangang magsagawa ng loyalty check sa hanay ng PNP dahil ang kanilang buong puwersa ay nananatiling tapat sa Saligang Batas at poprotektahan ang interes ng bayan.
- Latest