Luzon at Visayas uulanin pa rin ngayong Linggo
MANILA, Philippines — Bagamat walang public warning signal ang bagyong Domeng, patuloy naman nitong pauulanin ang malaking bahagi ng Luzon kasama ang Metro Manila gayundin ang Western Visayas sa susunod na dalawang araw.
Ayon sa Philippine Atmospheric Geophysical and Astronomical Service Administration, ito ay dahil patuloy na paiigtingin ni bagyong Domeng ang Habagat na siyang magpapaulan sa naturang mga lugar.
Alas-11:00 ng umaga kahapon, ang tropical storm na si Domeng ay namataan ng PAGASA sa layong 565 kilometro ng silangan hilagang silangan ng Basco, Batanes taglay ang lakas ng hangin na umabot sa 85 kilometro bawat oras malapit sa gitna at may pagbugso ng hangin na umaabot sa 105 kilometro bawat oras.
Si Domeng ay patuloy ang pagkilos pahilaga hilagang silangan sa bilis na 21 kilometro bawat oras.
Ngayong linggo, inaasahan ng PAGASA na si Domeng ay nasa layong 1,060 kilometro ng silangan hilagang silangan ng Basco, Batanes at sa lunes ay nasa layong 1,980 kilometro hilagang silangan ng Basco, Batanes o nasa labas na ng ating bansa.
- Latest
