Montano tinabla ni Digong
MANILA, Philippines — Mismong si Pangulong Rodrigo Duterte na umano ang nagsabi kay dating Tourism Promotion Board chief at aktor na si Cesar Montano na magbitiw na ito sa puwesto.
Ito naman ang idiniin ng isang impormante sa Department of Tourism makaraang humirit pa umano si Montano na hanggang Hunyo siya manatili sa DOT.
Ayon sa impormante, tinabla ni Duterte si Montano at sa halip ay pinayuhan itong agad nang lisanin ang kanyang posisyon.
Sinabihan din umano ito na huwag nang maghanap pa ng padrino upang manatili sa puwesto.
Dahil dito, mistulang wala nang tiwala ang Pangulong Duterte kay Montano makaraang masangkot sa kontrobersiyal na P320 milyong ‘Buhay Carinderia’ na isang culinary tourism project.
Ang proyektong pinondohan ng TPB at hindi umano sumailalim sa bidding ay natuklasan ng bagong Tourism Secretary na si Berna Romulo Puyat.
Ang P80 milyon sa P320 milyon ay naibayad na sa nasabing proyekto. Ito na rin ang naging dahilan upang suspindihin ni Romulo-Puyat ang ‘Buhay Carinderia’ project na umano’y aprubado ng board.
Una nang sinabi ni Montano na ang lahat ay aprubado ng board at matagal nang ginagawa sa TPB.
Sinabi rin ni Montano na si dating Tourism Secretary Wanda Teo ang nagpakilala sa kanya sa may ari ng Buhay Carinderia na si Linda Legaspi ng Marylindbert International.
Related video:
- Latest