Kongreso ‘di mabubuwag

MANILA, Philippines - Pinawi ng liderato ng Kamara ang pangamba ng publiko na posibleng mabuwag ang kongreso at masibak ang mga empleyado dito sa sandaling maging federalismo ang porma ng gobyerno.

Ito ang nilinaw ni House of Representatives Secretary General Atty. Cesar Pareja sa ginanap na seminar ng mga opisyal ng House Secretariat na may titulong “ Briefing on What is Federalism”.

Pinawi ni Pareja ang pangamba ng ilang empleyado at opisyal ng Kamara sa kung saan sila pupulutin sakaling maging federalismo ang bansa.

Paliwanag niya, maapektuham lang ang Kongreso sakaling i-adopt ang unicameral o parliamentary system of government at hindi ang federalismo.

Nilinaw pa ni Pareja na sakaling mag-shift sa federalism, ay magkakaroon ng federal legislature sa kada federal state, na nangangahulugan na ang experience at expertise ng mga opisyal at empleyado ng House secretariat ay mas kailangan.

Pinawi rin naman ni Atty. Artemio Adasa, House Deputy Secretary General for Legislative Operations, ang pangambang sibakan at tanggalan sa trabaho ng mga empleyado at opisyal ng House Secretariat.