P500-M smuggled at pekeng produkto nasabat ng BOC
MANILA, Philippines - Nasa P500 milyon mga smuggled at pekeng mga produkto ang nakumpiska ng pinagsanib na pwersa ng pulisya at Custom Intelligence and Investigation Service ng Bureau of Custom (CIIS-BOC) nang salakayin nila ang apat na warehouse sa Pasay City kahapon ng hapon.
Ayon kay Col. Neil Estrella, hepe ng CIIS, alas-2:30 ng hapon nang kanilang salakayin ang building 154,159,115 at 156 sa kahabaan ng Cuneta St. ng nasabing lungsod at naglalaman umano ito ng mga imported goods na pawang mga smuggled at peke.
Matapos nilang magsagawa ng inspection ay tumambad sa kanila ang naturang mga peke at smuggled na produkto, tulad ng mga branded na tsinelas, sapatos, mga damit, bag at sigarilyo, na tinatayang nasa P500 milyon ang halaga.
Iniimbestigahan na ng mga awtoridad kung paano nakalusot ang naturang mga pekeng produkto.
- Latest