CJ Corona tagilid!
MANILA, Philippines - Tumestigo kahapon sa impeachment court si Ombudsman Conchita Carpio-Morales kung saan kinumpirma nito na galing sa Anti-Money Laundering Council (AMLC) ang impormasyon at dokumento tungkol sa $10 milyon ni impeached Chief Justice Renato Corona.
Ayon kay Morales, ang AMLC ang nagbigay sa Ombudsman ng 17 pahinang report tungkol sa sinasabing dollar account ng chief justice.
Sa nasabing 17 pahinang reports, apat na pahina rito ang summary ng peso at dollar accounts na umano ay “strictly confidential” kung saan nakapaloob ang nasa 705 na transactions.
Sa pagsisimula pa lamang ng ika-37 araw ng trial, inatasan kaagad ni Senate President Juan Ponce Enrile na tumatayong presiding judge ang lead counsel ng depensa na si Serafin Cuevas na ipakitang hostile witness si Morales na iniharap nila bilang testigo.
Ayon kay Cuevas, iniharap nila si Morales bilang testigo dahil wala umanong basehan ang imbestigasyon ng Ombudsman sa sinasabing $10 milyong dollar accounts ni Corona.
Tinangka pa sanang pigilan ng depensa ang ‘power point’ presentation ni Morales pero pinagbotohan ito ng mga senador-judges kung saan nanaig ang presentasyon.
Sa testimonya ni Morales, ipinakita nito sa pamamagitan ng power point presentation ang iba’t ibang transaction na pumasok sa 82 dollar accounts ng chief justice na hindi nito isinama sa kaniyang Statement of Assets, Liabilities and Net worth (SALN).
Iginiit naman ni Cuevas na ang “pasabog” ni Morales laban kay CJ Corona ay labag sa karapatan ng kanyang kliyente.
Iprinisinta pa ni Morales sa impeachment court ang mga dokumento na nakuha nito sa AMLC na ipina-zerox naman upang mabigyan ng kopya ang mga senator-judges base sa request ni Senate President Pro-Tempore Jose “Jinggoy” Estrada.
- Latest
- Trending
