MANILA, Philippines - Pinagbabaril ng hindi pa nakikilang suspek si Kapatiran ng mga Nakulong na Walang Sala o Kakusa partylist Rep. Ranulfo Canonigo, sa isang ambush kahapon ng hapon sa Bgy. Nangka, Marikina City.
Ayon sa inisyal na impormasyon mula sa Marikina-PNP, papasok na sa kaniyang bahay ang kongresista lulan ng kaniyang kulay puting kotse ng barilin ng nag-iisang suspek ganap na alas-5:30 ng hapon.
Nagtamo ito ng tatlong tama ng bala sa leeg, hita at balikat at kasalukuyang ginagamot sa St. Luke’s Medical Center, Taguig.
Patuloy naman ang ginagawang imbestigasyon ng mga otoridad sa insidente.
Ang Kakusa partylist ay tumutulong at nagbibigay ng legal assistance sa mga bilanggo at sa kanilang mga pamilya.
Nagsasagawa rin ang partido ng medical programs sa mga matatanda at may sakit na mga inmates at scholarships para sa anak ng mga bilanggo.
Kabilang sa mga panukalang batas na naihain ni Canonigo ang House Bill 05543 na nagbibigay ng pagkakataon para sa isang bilanggo na nakapagsilbi na ng 20 taon ng kanilang sentensiya na magawaran ng parole at HB 05546, na nagsusulong para sa pagtatayo ng mga karagdagang penal institutions sa Luzon, Visayas at Mindanao at ang paglalaan ng kaukulang pondo para dito. (Mer Layson/Gemma Garcia)