MANILA, Philippines - Pormal nang naghain ng disbarment case sa Korte Suprema ang mga opisyal ng Sheriffs Confederation of the Philippines (SCHOPHIL) laban kay Davao City Mayor Sarah Duterte kaugnay sa pananakit nito sa isa nilang miyembro na si Sheriff Abe Andres noong Hulyo 1 sa isang demolition procedure.
Iyon ay kaugnay pa rin ng ginawang pananapak ng alkalde kay Sheriff Abe Andres na nagsisilbi lamang ng demolition order sa Barangay Soliman sa Davao City.
Batay sa 5-pahinang complaint affidavit na inihain sa Office of the Bar Confidant, iginiit nina SCHOPHIL Officers Patermoscio Labayani, Roberto Galing at Fernando Regino na nilabag ni Duterte na isa ring abogado ang ilang probisyon ng Code of Professional Responsibility.
Partikular umanong nilabag ni Duterte ang Canon 11 at Canon 7 ng nasabing panuntunan na nagsasaad na dapat na igalang ng isang abogado ang mga hukuman at ang mga judicial officer at dapat na itaguyod ng isang abogado ang integridad at dignidad ng legal profession.
Bilang mga sheriff, apektado rin umano ang mga opisyal ng SCHOPHIL sa marahas na pag-atake kay Andres.
Bunsod nito, hinihiling nila sa Korte Suprema na magsagawa ng imbestigasyon at padalhan din ng subpoena ang mga himpilan ng telebisyon para magsumite ng mga kopya ng video footage ng nasabing insidente.