MANILA, Philippines - Naglaan ang pamunuan ng Department of Education (DepEd) ng kabuuang P300 milyong pondo para tutustusan at bigyan ng magandang edukasyon ang mga kabataan sa Mindanao na tinawag na ‘Madrasah education for Muslim learners’.
Ayon kay Education Secretary Armin Luistro, mismong ang Pangulong Noynoy Aquino ang nag-utos sa kanila na itaas sa P300 milyon ang dating P200-milyon na pondo dahil sa layuning makamit ang kaayusan at kapayapaan sa Lupang Pangako.
Si Undersecretary for Programs and Project Dr. Yolanda Quijano ang naatasang mangangasiwa at tututok sa office of the Madrasah education para sa mga kabataang Muslim.
Nabatid na sina Sec. Luistro at Autonomous Region in Muslim Mindanao (ARMM) Governor Ansarrudin Alonto-Adiong ay pumirma ng isang kasunduan para sa mas malawak na pagtataguyod sa Arabic Language and Islamic Values Education (ALIVE).
Nagpalabas na ang DepEd ng kabuuang P75 milyon para sa orientation at pagsasanay ng mga Muslim na guro.