MANILA, Philippines - Daan-daang libong tao ang naglabasan sa kalsada at nag-abang at naghatid sa labi ni dating Pangulong Corazon Aquino sa Manila Memorial Park sa Paraña que mula sa Manila Cathedral kahit umuulan. Bukod pa ito sa maraming tao na nag-abang sa libing sa pamamagitan ng telebisyon, radyo at internet.
Bumagal ang usad ng trak na sinasakyan ng kabaong ni Aquino at ng convoy nito na kinabibilangan ng sinasakyan ng mga miyembro ng kanyang pamilya dahil na rin sa dami ng sumusunod na sasakyan at nakaharang na mga tao kaya nahirapan itong lumabas sa Intramuros Maynila..
Alas-11:23 ng umaga nang magsimula ang prusisyon ng libing. Inabot ng mahigit 10 oras bago nakarating ang labi ni Aquino sa Manila Memorial Park.
Karamihan ng mga tao ay humihiyaw ng “Cory, Cory”, nakasuot ng dilaw na t-shirt o laso, nagpapalipad ng mga dilaw na lobo, nagsesenyas ng Laban. May 18 sako ng dilaw na bulaklak ang ibinuhos ng dalawang helicopter ng militar sa bawat kalsadang dinaanan ng prusisyon. Bukod pa ito sa mga confetti na inihahagis mula sa matataas na mga gusali sa ruta ng libing.
May ilan naman na nagtitinda ng payong at kapote at dilaw na t-shirt. Hindi naman mapigilan ng mga tao na mapaluha kasabay ng pagsisigaw ng “Cory, Cory”, “Paalam Tita Cory”, “Maraming Salamat po Tita Cory” at “We Love You Tita Cory” nang dumaan sa kanilang harapan ang karo ng dating Pangulo. Naglitawan din sa paligid ang mga poster o larawan ni Aquino at ng asawa niyang si dating Senador Ninoy Aquino.
Dahil sa hindi makontrol na pagdagsa ng mga tao sa daraanan ng funeral convoy, napilitang magsagawa ng human chain upang umusad ang sinasakyan ng namapayang dating Pangulo.
Nakasakay sa isang coaster ang pamilya Aquino na kasama sina Kris at Senator Noynoy Aquino habanng nakabuntot sa truck na kinalululanan ng mga labi ni Gng. Aquino. Ilang sandaling binuksan ang bintana ng coaster ng pamilya Aquino upang magpasalamat sa mga taong dumagsa para makiramay at maihatid sa huling hantungan ang kanilang mahal na ina at ina ng demokrasya.
Bago pa man nakarating sa Manila Memorial Park ay libu-libong katao na ang naghihintay sa sementeryo.
Sa pagtaya ng National Capital Region Police Office, aabot sa 130,000 ang mga taong nagpakita ng pakikidalamhati kay Aquino.
Sa himpilan ng Philippine Air Force at Philippine Navy, nagsagawa ng 21-gun salute bilang parangal kay Aquino na dati nilang commander-in-chief. Sa sementeryo, binigyan din ng arrival honor ng militar ang yumaong dating pangulo.
Si Gng. Aquino ay inilibing sa tabi ng puntod ng kabiyak niyang si dating Senador Benigno “Ninoy” Aquino. (Doris Franche, Gemma Garcia, Mer Layson Ludy Bermudo, Rose Tesoro, at Ellen Fernando)