Bolante darating na, Senado alerto

Matapos kalampagin ng mga kasamahang senador, inutusan kaha­pon ni Senate President Ma­nuel Villar si retired Gen. Jose Balajadia Jr, Senate Sergeant-at-arms na ares­ tuhin si dating Agriculture Undersecretary Jocelyn “Joc-Joc” Bolante pagda­ting sa bansa.

Sa statement na ipina­labas kagabi ng opisina ni Villar, sinabi nito na inu­tusan na niya si Balajadia na ipatupad ang arrest warrant laban kay Bolante na ipinalabas ng Senado noong Disyembre 2005.

Pinaaaresto si Bolante dahil sa ilang beses na pang-iisnab nito sa mga pag­dinig ng Senate Committees on Agriculture and Food at Accountability of Public Office and Investigations kaugnay sa P728 million Fertilizer Fund Scam.

Pinaniniwalaan na si Bolante ang utak sa pagda-divert ng pondo sa fertilizer sa campaign fund ni Pa­ngulong Gloria Arroyo noong 2004.

Pinanindigan ni Villar na balido pa ang nilag­daan niyang arrest order noong vice chairman pa siya ng nabanggit na komite.

Ipinaliwanag pa ni Villar na hindi dapat ma­ging katuwiran na wala nang bisa ang arrest warrant na ipinalabas noong 13th Congress dahil ga­ga­mitin itong sangkalan ng mga nang-iisnab sa mga imbes­tigasyon ng Senado.

Ayon pa kay Villar, inu­tos na rin niya na ipakalat ang mga tauhan ng OSSA sa Ninoy Aquino International Airport upang ban­tayan ang pagbabalik ni Bo­lante.

Hiningi noon pang Bi­yernes ni Senador Miriam Santiago ang pagdakip kay Bolante na inasahang da­rating ngayon makaraang ipadeport ng United States pabalik sa Pilipinas.

Pero nagkaroon ng kalituhan dahil nasa ibang bansa pa si Villar at walang pipirma ng arrest warrant. Nagkaroon din ng agam-agam dahil hindi matiyak kung bali­ do pa ang na­unang arrest warrant na ipina­labas laban kay Bolante. (Malou Escudero)