Pinangunahan ni Philippine National Police (PNP) Deputy Dir. Gen. Emmanuel R. Carta, deputy chief for operations, ang delegasyon ng mga top Filipino police officials patungong Bali, Indonesia dahil sa imbitasyon ng Indonesian National Police (INP) sa pagsusulong ng bilateral agreement upang labanan ang transnational crimes.
Inaasahan na pag-uusapan ng dalawang bansa ang pagbuo ng libro o handbook, structural revision pagdating sa edukasyon at pagsasanay ng mga pulis at ang pagsusulong ng PNP-INP joint program ng 2008.
Noong Nobyembre 18, 2005 ay lumagda ang pambansang pulisya ng Pilipinas at Indonesia ng isang bilateral agreement bilang kooperasyon sa pagpigil at paglaban sa transnational crimes.
Si Carta na tinitingnang papalit kay PNP chief Dir. Gen. Avelino Razon Jr. ay nakipagkita kay P/Sr. Supt. Muhamad Nur Usman ng INP para sa 3-araw na pagpupulong kasama ang 12 PNP officials. (Joy Cantos)