Ayon kay Sen. Panfilo Lacson, nagkakaroon na sila ng direct negotiation para magkasama sa iisang tiket ang mga independent senators na kaanib ng Wednesday bloc at ang opposition bloc sa Senado. "Seryoso naming kino-consider yung grand coalition na pantapat doon sa administrasyon," anang senador.
Ang Wednesday bloc sa Senado ay kinabibilangan nina Senate President Manuel Villar, Senate Majority Leader Francis Pangilinan, Sens. Ralph Recto at Joker Arroyo.
Bagamat mga kandidato sila ni Pangulong Arroyo noong 2001 senatorial elections sa ilalim ng People Power Coalition o PPC, ayaw na umano nilang kumandidato muli sa ilalim ng administration party dahil sa mga kontrobersyang kinasasangkutan ng Pangulo.
Kapag nabuo ang grand coalition, hindi malayong mabokya ng koalisyon ang mga kandidato ng administrasyon dahil na rin sa lumabas na survey ng Pulse Asia na ang pinakamalakas na kandidato ng administrasyon na si Presidential Chief of Staff Mike Defensor ay nasa pang-16 na puwesto lamang.
Sinabi naman ni Lacson na baka sa Oktubre pa siya makapagdesisyon kung tatakbo sa senatorial elections o sa pagka-alkalde ng Maynila. (Rudy Andal)