Nakiusap din si dating State Prosecutor Dennis Villa-ignacio kay Justice Sec. Raul Gonzalez na ibasura ang petition for parole ni Go dahil si Go ay isa umanong malaking threat sa lipunan kapag pinayagang lumaya.
Si Go, na nahatulan ng life imprisonment ng Pasig Regional Trial Court noong 1993 ay nag-file ng executive clemency sa Board of Pardons and Parole para agad siyang makalaya sa National Bilibid Prison (NBP) sa Muntinlupa City.
Matatandaang tumakas si Go bago siya bigyan ng sentensiya ng korte, ngunit matapos ang 3 taong pagtatago ay nahuli.
Ayon kay Mrs. Rosario Maguan, ina ng biktima, hindi dapat agad makalaya si Go dahil 13 taon pa lang siyang nakakulong, gayong life ang ipinataw sa kanya ng korte.
"Marami pa siyang (Go) dapat pagdusahan dahil pinatay niya ang anak ko na walang kalaban-laban. Marunong kaming magpatawad pero hindi pa napapanahon,"sabi ni Mrs. Maguan.
Napag-alaman pa ng mga Maguan sa korte na hindi pa rin nagbabayad si Go ng danyos na P3.2 milyon sa pamilya ng biktima.