Ikapasigarbo gyud!

CEBU, Philippines — Gipaniguro sa mga bituon sa umaabot nga show sa GMA-7 nga Voltes V: Legacy nga mahatagan nila og igong hustisya ang pagkalakip nila sa maong Filipino live adaptation .

Pasabot nila nga gawas sa karaang imahe sa Voltes V,  aduna pud sila'y estilo aron makasabay ang maong program sa bag-ong henerasyon.

Nitikang dinhi sa Sugbo dili pa lang dugay ang mga bituon niini nga sila si Miguel Tanfelix (Steve Armstrong), Ysabel Ortega (Jamie Robinson), Radson Flores (Mark Gordon), Matt Lozano (Big Bert) ug Raphael Landicho (Little Jon Armstrong), ug gibutyag sa maong mga artista nga dili basta-basta ang ilang pagpangandam niini ilabi na nga dili malikayan nga duna gyuy mangumparar sa bag-ong Voltes V ngadto sa karaang version niini.

Dakong garbo alang kang Miguel nga mahatagan og dakong responsibilidad ug mapasalamaton siya  niini sa GMA-7 .  Dili hinuon malikayan nga bation siya og ginagmay nga kulba.

"Medyo kinabahan, kasi alam naman natin kung gaano kabigat ang karakter ni Steve," matud pa ni Miguel.

Apan kun si Ysabel usab ang pasultihon,gipaniguro niya nga ma-highlight  ang mga positibong kalidad sa kababaenhan pinaagi sa karakter niya nga Jamie  nga nagtangag kaniadto sa imahe nga simbolo sa kaanyag.

"Maraming magagawa ang kababaehan.  Mas maraming maipapakita na ibang bagay si Jamie, oo simbolo siya ng kagandahan, pero may magagandang nagawa sa kapwa niya ," nagkanayon si Ysabel.

Na-pressure siya gamay  gumikan kay nasayod siya kun unsa ka inila ang karakter ni Jamie kaniadto ilabi na nga mao kini ang bugtong babaye sa grupo.

Samtang si Matt sa iyang bahin, medyo gikilig siya sa kanunay isulti sa iyang fans nga nahaom kaayo ang iyang hitsura isip Big Bert.

Dili basta-basta ang iyang role sanglit siya ang  mopakalma sa grupo ilabi na kun dunay mga mahitabong panagbikil.

Giisip niya ang Voltes V nga usa sa  bug-at  nga instrumento sa pagsulbong sa iyang career.

Ang child star nga si Raphael sa iyang bahin,  na-feel gyud niya kun unsa siya ka-welcome sa iyang mga kaubanan busa komportable ra gyud siya sa nagpadayon nga taping niini.

Naka-familiar usab si Radson sa pipila ka pamaagi sa pagdala og kabayo, busa nakatabang kini sa role niya isip rodeo champion.

Usa sa gibuhat niya nga preparasyon mao ang pagtan-aw og pipila ka episodes sa karaang Voltes V.

Makawala matud pa sa kakapoy ang mga maayong feedback sa katawhan nga nakakita sa trailer sa maong show.

Gipaabot nga katapusang bahin sa first quarter karong tuiga o ba kaha sa second quarter ang pag-ere sa GMA-7 sa maong programa.

Ang Voltes V: Legacy, mugna ni Filipino film director Mark Reyes ug gibana-bana nga maabot kini og 80 episodes.

Moabot ngadto sa walo ka tuig ang pagplano niini ilabi na pagproseso sa pagkab-ot sa approval niini sa  Toei Company, nga maoy nag-produce sa  original Voltes V anime series niadtong  1970s.