Mura’g lola ni Alden

CEBU, Philippines — Gipikhan na sab ni Lolit Solis si Bea Alonzo. Post sa beteranang kolumnista ug talent manager sa IG sa nilabay nga adlaw, daw nanay ni Yasmien Kurdi ug lola ni Alden Richards ang dagway ni Bea sa umaabot nga GMA7 series, Start Up. TIguwang na matud pa. Co-stars sa maong serye sila si Bea, Alden ug Yasmien. Niingon sab si Lolit sa lain sab niyang post nga daw laos na og dagway si Bea, mas wala nay kasanag kaysa niadtong sakop pa kini sa Star Magic. Hangtud karon, padayong hilom ang kampo ni Bea bisan paman sa sunod-sunod nga birada ni Lolit batok sa aktres nga nilungtad na og pipila ka mga bulan.

“True superstar”

Apan kun si Jeric Gonzales maoy pasultihon, “true superstar” alang kaniya si Bea Alonzo. Magkatrabaho sila si Jeric ug Bea sa Start Up, ug importante kaayo ang role ni Jeric sa maong serye hinungdan nga daghan sila og mga eksena sa aktres. Sa exclusive interview sa PEP, niingon si Jeric nga kaniadtong wala pa sila nagkatrabaho ni Bea, nabatyagan na niyang maayo kining tawo. Ug iya gyud kining napamatud-an niadtong nagkatrabaho na sila. Suma pa niya, mapaubsanon ug matinabangon kaayo si Bea ngadto sa tanan. Nahimo matud pa niya tanan niyang malisud nga mga eksena kay gitabangan siya ni Bea.

Dili pugson, dili dalion

Giklaro sa magtiayong Megan Young ug Mikael Daez nga okay ra nila nga wala pa silay anak, duha ka tuig human sila nagpakasal. Sa latest podcast sa magtiayon, gipadayag ni Megan nga makugang matud pa ang ilang mga higala nga okay ra sila kun dili sila makabaton og mga anak. Suma pa niya wala pa madawat sa kulturang Pinoy ang ingon niini nga mentalidad. Apan matud sa kanhi Miss World, kun dili sila makaanak, okay lang. Kun makaanak sila, okay ra pud. Magpadayon matud pa ang ilang pagkinabuhi. “If we have kids, then we have kids. If we don’t, we don’t. If I get pregnant, okay, and if not, then we just continue living life,” ni Megan pa.

Balik eskuyla si Karla

Back- to -school si Karla Estrada. Nag-post siya og mga hulagway niya samtang nag-rampa sa Philippine Christian University campus. Caption niya niini: And the journey begins. Where’s the canteen??” Wala pa gibutyag ni Karla unsay iyang kurso, apan nagbaha ang mga pagdayeg ug pagdasig nga nadawat sa inahan ni Daniel Padilla sa iyang pagbalik og tungha sa edad nga 40-anyos kapin. May usa pa ka abogado nga nikomento nga, 40 na sab siya kapin sa iyang pagkuha og abogasya, ug karon usa na siya ka civil rights attorney. Suma pa niini, dili babag ang edad.

Natilok ang kaisog

Padayon ang pagpatambal ni Kris Aquino didto sa Houston, Texas. Apan sa chat niini ngadto sa iyang higalang writer-editor nga si Dindo Balares, giangkon ni Kris nga gitilok na sa Houston ang iyang kaisog sanglit dili gyud lalim ang iyang mga giagian karon. Post ni Balares sa Facebook niining bag-o lang, nagkanayon: “Tuloy ang pagpapagamot ni Kris. At tulad ng sinumang sumasailalim sa serye ng masusing medical examinations, may mga panahong mababa ang emosyon. ‘Inuubos na ng Houston ang tapang ko,’ sabi na rin niya nitong huling chat namin. Alam na siguro ninyo na hindi siya labas sa pamilya ko. Kaya kung ano ang schedule ng kulit ko sa pag-check sa mga anak ko pagkatapos ng maghapong pag-aasikaso sa mga pananim, ganoon din sa kanya.”

Atty. Woo, moanhi

Moanhi sa Pilipinas si Amazing Attorney Woo. Ang tsika, gitakda moabot sa nasud ang labing sikat nga abogado karon sa “Netflix” nga si Park Eun Bin alang sa usa ka fan meeting kauban ang iyang Filipino fans didto sa Manila sa October 23, 2022.

Mag-military si Kang Tae-oh

Temporaryong nanamilit sa iyang fans si Kang Tae-oh niining bag-o lang sanglit gitakda na siya nga moalagad sa military didto sa South Korea, ug molungtad kini og dul-an duha ka tuig. Si Kang Tae, mao ang leading man ni Park Eun Bin sa Netflix legal series nga Amazing Secretary Woo, hinungdan nga ilado sab siya sa mga fans.

Belle, nirampa sa Seoul

Nirampa sa Seoul International Drama Awards ang Kapamilya star nga si Belle Mariano sa nilabay nga adlaw. Didto, gidawat niya ang iyang pasidungog isip Outstanding Asian Star diin dul-an sa 200 ka celebrities gikan sa nagkadaiyang mga nasud ang iyang nakatigi sa maong award.