Diana vs. Herlene

Managsama nga mga kandidata sa Bb. Pilipinas karong tuiga sila si Diana Mackey ug Herlene Budol o Hipon Girl.  Apan managlahi ang ilang mga reaksyon mahitungod sa mga basher.

Si Diana nga nahinabi sa PEP niingon nga wala una siya mobasa og online comments mahitungod sa iyang pagka kandidata sa nahisgutang pageant karong tuiga aron dili maapektuhan ang iyang pagpangandam.

 Dili sab gyud kini lisud nga buhaton alang niya sanglit deadma man gyud siya sauna pa.

Sa samang higayon, aminado siya nga aduna gyuy pressure alang kaniya ang iyang pagsalmot sa maong national pageant, apan iya kining gihimong sukaranan aron buhaton gyud ang kutob sa iyang mahimo alang sa iyang mga kaliwat ug mga kahigalaan nga nagsuporta ug kumbinsido nga aduna siyay dakong kahigayonan sa maong pageant.

Suma pa ni Diana, dako sab og natabang niya ang iyang pagkahimong PBB housemate kaniadto, sanglit nakakat-on siya unsaon paghandle ang iyang bashers. Naglikay gyud siya og mga negatibong komento aron dili maapektuhan ang iyang mental health.

 Niya pa, ang mga komento lamang sa mga tawo nga iyang gihigugma ug sa mga nag-train niya maoy iyang paminawon ug tuohan.

Apan sukwahi si Hipon Girl. Suma pa niya ngadto sa PEP, mobasa gyud siya og negative comments. Nalipay pa gani siya nga bisan pa man og daghang nahimuot nya, aduna gihapon siyay bashers.

Matud niya, ang komento sa bashers maoy iyang gigamit aron mas palambuon pa ang iyang kaugalingon ug korehian ang wala nila mauyoni. Maayo matud pa nga adunay bashers kay dili niya mahibaw-an ang iyang mga sayup kun wala ang mga hinawayon.

Adunay 40 ka mga kandidata ang Bb. Pilipinas karong tuiga, diin lakip kanila ang pambato sa Sugbo nga si Nicole Borromeo.