Abuso kayo

Kaniadtong miaging hapon, grupo sa mga motorcycle riders nga nagsakay og dagko kaayong mga motorsiklo, naglumba pag-agi nila sa Veterans Drive sa Barangay Busay.

Kaming mga nagtan-aw, wa makapugong paghiyak sa among tiyan tungod sa kakuyaw.

Mi-overtake man gud sa mga sakyanan ang mga big bikes ug didto na miagi sa pikas lane, ug diriyot kini makaigo og laing motor.

Tiaw mo, kadtong motor nga nagsubay ra tawon sa iyang “lane,” unya husto ra sa gikusgon ang pagdagan, maaksidente unta kay madam-agan niadtong nag-big bike?

Way nagpugong ninyong mga nag-drive og big bikes nga mopakusog sa pagpadagan, apan ayaw intawon mo pagpakusog sa pagpadagan diha sa mga dapit nga daghang sakyanan.

Mopaluyo ko ni LTO-7 Regional Director Vic Caindec nga magyawyaw ug misaway niining maong mga motorsista nga naghatag lang og risgo sa mga nagtinarong pag-drive.

Kadto lang nahitabo sa Trans-Central Highway nga ang usa ka four-wheeled vehicle nagsubay ra gyud tawon sa iyang agianan, apan gidam-agan sa big bike kay mikawat na man kini pag-agi sa pikas “lane” sa kurbada nga bahin.

Ambot, wa man sab mohimo si Director Caindec og hugot nga lakang nga pangdakpon kining maong mga motorista nga naghatag og risgo sa publiko.

Mogara ra ba gyud kini sila kon dunay mga gitawag nila’g “mamitikay” nga mokuha kanila og hulagway. Kon magpraktis mo pagpakusog pagpadagan, himoa ninyo kanang way mga sakyanan.

Pananglit gikan sa tungang gabii paingon sa alas singko sa kadlawon, kana pwede kay menos pa ang mga sakyanan. Apan kon hapon na gani, porbida.

Sa laktud, “gara-gara” na lang gyud na ang inyo, ug moabot ra ang higayon nga motagam ra mo kon makasugat mo’g aksidente sa tanto ninyong kiat diha sa karsada.

* * *

Kumusta na kaha ang pag-modernize sa mga public utility vehicles, sama sa PUJ dinhi sa Dakbayan sa Sugbo?

Akong pahibaw-on si Konsehal James Cuenco, ang chairman sa Committee on Transportation, nga dili magpataka pagtugot sa mga PUJ nga makabalik pagdagan.

Nakabantay man gud ko nga may mga multi-cab man nga nahatagan og pagtugot nga makabalik sa pagpamasahero.

Daghan ang nakapangutana kon nganong nakabalik man sa pagbiyahe ang maong multi cab, nga gipahibawo man unta ni Cuenco nga ang multicab dili na gyud tugotan nga magamit isip public transport?

Makalapas sa “social distancing” kon tugotan nga makapamasahero ang mga multicab, kay mag-abot man gani ang mga tuhod sa pasahero.

Unya, nakabantay sab ko nga wa na may bakante ang lingkoranan, pulos na man ukopado kay gilingkoran konsehal?