Mga rayna makatrabaho ni Maris

CEBU, Philippines — Dakong garbo alang kang  Maris Racal nga makatrabaho ang  real-life beauty queens nga sila si Gloria Diaz, Maxine Medina, ug Winwyn Marquez. Iyaha kining makauban  sa upcoming series sa iWant nga  "Beauty Queens."

Si Joel Lamangan ang direktor sa maong proyekto nga mosikad karong July 15.

"Reyna ng kagandahan. Tinitingala ng karamihan. Pero hindi naging sapat ang korona para maranasan n'ya ang kaligayahan. Makikilala mo na si Tarsila," suma pa sa IG post ni Maris.

Dance cover ni Ella gikagubtan

Padayong naglawig ang pangalan ni Ella Cruz sa natad sa pagsayaw.

Gikagubtan  sa netizens ang bag-o niya nga  vlog entry kun diin nidalit siya og dance cover sa   “How You Like That” nga  comeback song  sa South Korean girl group nga Blackpink.

Pipila ka oras gikan sa pag-upload niini, nakalangkat dayon kini og tunga sa milyon nga views.

Heart busy sa pagtabang

Dili gyud mahimutang si Heart Evangelista  kun magpundo lang kanunay sa panimalay ug ganahan gyud siya  mogawas aron motabang sa iyang isigkatawo.

Sa miaging adlaw , giduaw sa aktres ang pipila ka tambalanan sa Sorsogon kun diin nag-alagad isip governor ang iyang bana nga si Chiz Escudero.

Nag-apod apod  og vitamins ang aktres ngadto sa mga pasyente.

Nasayran nga makadaghan na nga higayon nga giduaw ni Heart ang mga tambalanan sa maong dapit ug nitunol kini og hinabang.

Natural ang tanan

Gibutyag sa Kapuso star nga si Gil Cuerva nga natural gyud  ug walay gipeke sa pictorial niya sa usa ka brand sa underwear.

Nasayran nga  nakadawat og mga pagdayeg si Gil  gumikan kay matud pa angayan kini sa iyang mga hulagway.

Nabatyagan usab sa iyang fans nga nilutaw og samot ang kaguwapo sa maong model-actor.

Janella mihagit sa  kanhi PA

Gihagit ni Janella Salvador ang  kanhi niya personal assistant nga si Michelle Pelongco  nga ipasaka sa korte ang kalabot sa  akusasyon niini  nga wala siya gihatagan og suweldo sulod sa 12 ka adlaw nga pag-alagad sa aktres.

Kahinumdoman nga nidangop sa programang  Raffy Tulfo in Action  ang kanhi niya personal assistant gumikan kay matud pa wala niya kini hatagi sa P3,600 nga suweldo sulod  sa pipila ka adlaw niya nga pagtrabaho.

Pinaagi sa iyang Twitter page, gitubag ni Janella  ang akusasyon ni Pelongco

Matud pa niya nga dunay saktong luna sa pagpadangat og reklamo. Giingnan niya si Pelongco nga ikiha siya kun duna siyay nabuhat nga sala. “I really don't believe I have to defend myself because trial by media is not the appropriate venue for this. If you believe in your own lies and I really violated something, sue me," tweet pa sa aktres.

Matud pa ni Janella nga tataw nga nagmugna lang og istorya ang kanhi niya personal assistant  ug kun bout huna-hunaon imposible kaayo nga dili siya makahatag og P3,600 .

“If you're gonna twist the story in your desperate attempt to get money from me... sorry, hun. 3.6K is small and I would gladly give it to someone who deserves it. Not worth my time,” mensahe pa ni Janella ngadto kang Pelongco.

Alden miraket pagka-cameraman

Trending sa social media ang behind-the-scene photos   ni Alden Richards sa Eat Bulaga sa miaging adlaw.

Nasayran nga sa usa ka segment sa maong show kun diin walay apil si Alden , ang aktor maoy nagsilbing cameraman.

Nahibaw-an lang kini sa viewers sa dihang nilenggua si Vic Sotto nga duna sila’y guwapo nga cameraman niadtong higayona.

Nasayran nga giminosan na ang mga tawo sulod sa studio aron mamintinar ang social distancing isip usa sa pamaagi sa paglikay sa pagkuyanap sa coronavirus. 

Taping undangon na?

Niulbo karon ang hungihong  nga matud pa posibleng paundangon sa taping ang mga bitoon sa Kapamilya series nga “A Soldier’s Heart” gumikan sa kasamtangang suliran sa ilang mother network.

Ang maong teleserye gibidahan nila ni Gerald Anderson, Carlo Aquino, Jerome Ponce, Vin Abrenica, Yves Flores, Elmo Magalona, Nash Aguas ug Sue Ramirez. Hinoun nanghinaot ang mga suki sa maong teleserye nga dili kini mahitabo sanglit kusog man  kini sa masa sama sa Ang Probinsyano ug Love Thy Woman .

Pabiling tak-om si Gerald sa maong taho.

Max nanganak  na!

Gihimugso na sa Kapuso actress nga si Max Collins  sa miaging adlaw ang unang anak nila sa iyang bana nga si Pancho Magno.

Lalaki ang unang liwat sa magtiayon ug gipaagi kini sa water birth.

Nagpakasal sila si Max ug Pancho niadtong 2017 sa usa ka dakong hotel sa Pasay City. 

Kapuso stars miunong sa ABS-CBN

Pipila ka mga personalidad sa Kapuso Network ang nipadangat sa ilang  suporta ngadto sa ABS-CBN.

Nasayran nga nakasinati karon og suliran ang maong network tungod sa isyo sa renewal sa ilang franchise.

Suma pa ni Glaiza De Castro  nga ubay-ubay gyud ang naapektohan sa pagkahunong sa operasyon  sa Dos.

“Hindi na ito labanan ng istasyon, laban to ng mga Pilipino. Lahat tayo apektado. Dasal, kapit, akap,” tweet pa ni Glaiza.

Samtang nasagmuyo usab si   Chynna Ortaleza  sa mga isyu nga gibato sa  ABS-CBN atol sa hearing.

Nasakitan siya nagtan-aw sa dili maayong pagtratar sa pipila ka mga kongresista ngadto sa mga opisyales sa ABS-CBN.

“Sobrang lala ng heartbreak ko. I know arguments happen but personally I try my best to talk to people with respect even if it gets heated. Why? Why do you have to speak this way sir? So condescending” suma pa ni Chynna.

Samtang ang Kapuso news personality nga si Raffy Tima nipadangat usab sa iyang dakong pagrespeto sa ABS-CBN.

“Respeto at suporta sa aking mga kapwa mamamahayag. Naway patuloy namin kayong makasama sa pagbabalita,” suma pa sa social media post ni Raffy .