CEBU, Philippines — Gidayeg sa netizens si Miko Raval kinsa nisikat karon isip Fabio Serrano sa top rating teleserye sa ABS-CBN nga The Killer Bride. Kini kay mapasigarbuhon kaayo si Miko nga gibalandra gyud online ang mga hulagway nila sa iyang uyab in real life nga si Kaira Dimatulac. Klaro pa gyud matud pa nga si Miko ang naggunit kanunay sa camera nga nagpasabot nga siya gyud maoy ganahan nga maghulagway silang duha ug nga proud gyud siya kang Kaira.
Magsuwat og libro
Adunay suwaton nga novel si 2015 Miss Universe Pia Wurztbach ubos sa ABS-CBN Publishing. Apan giklaro niya nga dili kini istorya sa iyang kinabuhi kundili basi usab sa mga nadunggan niya gikan sa iyang mga higala. Kabahin matud pa kini sa usa ka beauty queen nga gisagubang ang mga kalisdanan sa kinabuhi hangtud nga nagmalampuson.
Mubalik sa Singapore
Si Kris Aquino maoy pasidunggan sa PMPC awards og Ading Fernando Lifetime Achievement Award karong gabii, apan dili siya personal nga modawat niini sanglit molupad siya paingon sa Singapore alang sa iyang medical tests. Ang iyang mga anak nga sila si Josh ug Bimby maoy modawat sa pasidungog ni Kris.
Pabor si Marian
Aprobado gyud ni Marian Rivera ang panagparis nila ni Dingdong Dantes ug Jennylyn Mercado sa Pinoy adaptation sa GMA7 sa sikat nga koreanovela Descendants of the Sun. Gani sa usa ka hulagway nga gi-upload ni Dingdong sa Instagram nga kuha atol sa usa sa ilang mga eksena, gi-congratulate pa ni Marian ang iyang bana ug si Jen.
Dili Tinuod
Fiction o dili tinuod. Kini maoy komento sa amahan ni Alden Richards nga si Richard Faulkerson Jr. kabahin sa usa ka post nga matud pa nilugwa ang aktor/tv host sa set sa Isa Pa With Feelings movie ni Maine Mendoza ug Carlo Aquino. Ang chika pa sa netizen, kadlawon matud pa niabot si Alden sa last shooting day sa nahisgutang pelikula. Apan suma pa sa amahan ni Alden, chika ra ang tanan ug dili tinuod.