Born beautiful mang-hugyaw karon

CEBU, Philippines – Dili man bag-o ang paghupot sa papel nga mahimong usa ka transgender sa mga nagkadaiyang mga proyekto apan gikonsiderar sa Kapuso star nga si Martin Del Rosario nga ang papel isip si Barbs Cordero sa iyang pelikula nga “Born Beautiful” maoy iyang  matawag nga dako nga hagit nga iyang nadawat ug nalampus sa iyang karera.

“Hindi bago sa akin ang paggawa ng gay role. Pero first time kong gawin na yung character is buong buo. Nasundan ko talaga ang storya ni Barbs,” saysay pa sa 26 anyos nga aktor.

Ang Born Beautiful nga ubos sa direksyon ni Perci Intalan ipagawas na sa mga sinehan sugod karong adlawa. Ang maong pelikula magsilbi kini nga istorya sa kinabuhi ni Barbs kinsa mao ang suod nga higala ni Tricia sa blockbuster hit nga “Die Beautiful” nga gibidahan ni Paolo Ballesteros niadtong 2016.

Ang Die Beautiful mao ang gihimoan og basehan sa pagama sa Born Beautiful kun diin gihagpat ang karakter ni Barbs kinsa orihinal nga gidala kaniadto ni Christian Bables.  Si Barbs mao ang nagsilbi nga beautician ni Tricia sa dihang gihaya kini kaniadto sa Happy Ending Funeral Homes.

Tungod kay nakita sa mga nanan-aw nga mas maayo nga ipakita sab ang anggulo sa istorya sa kinabuhi ni Barbs, wala magduha-duha  si Direk Perci nga iduso kining maong sugyot og hatagan kini og katumanan tungod kay gawas nga lingaw, aduna sab kini nagpahipi nga mga pagtulun-an dili lang sa mga transgender nga sama ni Barbs ug Tricia apan alang sab sa tanan.

Dakong kalipay ang gibati ni Martin nga siya ang gitugyanan sa maong karakter nga unang gidala ni Christian.

Matud pa ni Martin nga wala gyud siya magduhaduha sa pagdawat sa maong tanyag ngadto kaniya gumikan kay trabaho na ang nanguhit kaniya ug napanglantawan niya nga sadya sab ang proseso sa pagama sa maong pelikula tungod kay gawas nga kabahin kini sa kinabuhi sa usa ka transgender apan dinhi sab niya  masukod ang iyang katakus isip usa ka aktor.

Mapasalamaton siya ngadto kang Direk Perci tungod kay nahatagan sab siya og break nga makabida og dako nga pelikula sama niini.

“Gusto ko magpasalamat kay Direk sa opportunity. Ito ang pinakamalaking break na natanggap ko. Ito rin ang pinaka-challenging at pinaka-fulfilling. Hindi ko pa siya napapanood pero alam ko kasi ang effort na in-exert ng lahat para pagandahin ito”, suma pa sa aktor.

Gisaysay sab ni Martin ang iyang mga pagpangandam alang sa maong pelikula. Matud pa niya nga gawas sa pisikal nga preparasyon, nagpatudlo sab siya sa model ug komedyanteng aktres nga si Wilma Doesnt kun unsaon ang husto nga paagi sa paglakaw.

“Natutunan ko kay Miss Wilma is confidence. Yung form ng katawan hindi mo mababago, pero pag inisip mo na maganda ka magagawa mo na din”, suma pa ni  Martin.

Tungod sa maong pamulong, nadasig ni Martin nga kanunay nga isulod sa iyang alimpatakan nga maanyag gyud siya sa matag higayon nga moatubang na siya sa kamera.

Mas nisamot sab siya nagmadasigon kanunay tungod kay anaa ang iyang amahan nga nag-apong kaniya atol sa shooting.

Gani, mao sab kini ang nagsilbi nga moatiman kaniya nga tarungon ang iyang postura ug iyang buhok sa panahon nga gikan kini nga nidalikyat og pahuway.

Asoy pa ni Martin nga taud-taud niya nga midala sa karakter isip usa ka transwoman, naanad na siya sa mga pa-wax nga pagahimoon sa iyang paa, batiis, ilokan ug sa iyang bungot.

Dugang pa niya nga naanad na sab siya sa pagsul-ob sa mga sapot sa mga babaye nga kanunay nga piit aron tataw ang porma sa lawas. Gitawag gyud kini ni Martin ang maong ritwal sa pagpagwapa og “tiis ganda” tungod kay samtang nga nag-memorize pa siya sa iyang lima ka papel nga linya, gipadayunan pa gyud siya og butang og make up ug mao kini nga makaingon si Martin nga kuti man ang mahimong babaye apan nalingaw ra sab siya sa maong buhat.

Gitataw ni Martin nga dili angay nga ikwestyon ang iyang pagkalalaki gumikan kay lalaki sab gyud siya sa tinuod nga kinabuhi. Nalingaw man lamang siya nga nakadala man lang sa kinabuhi sa usa ka transgender ug ebalwasyon pa niya nga dili gyud lalim ang mahimong usa ka transgender gumikan kay dili lang ang pisikal nga postura ang kinahanglan nga antuson,  hasta sab sa pagbati nga bation sa samang laing binuhat nga sama og sekswalidad. Mi-esplikar sab si Direk Percy sa buot nga ipaabot sa pelikula ngadto sa mga motan-aw.

“This is about Barbs searching for happiness. Hindi na issue dito yung identity. Napagdaanan na natin ‘to. I say this from experience as a gay man”, pulong pa sa direktor.

Pagsuporta pa ni Martin sa pamahayag sa direktor nga usa ka kalipay nga gipangita ni Barbs mao ang kalipay sa paghigugma sa laing binuhat. Gibahin ni Martin ang iyang nakat-unan sa maong paghupot niya sa maong papel sa istorya,

“Kapag nagmahal ka, ibigay mo ng todo-todo. Walang masama kung nagmamahal ka lang ng tao. Lahat naman tayo nagmamahal, lahat tayo alam ang ginagawa natin because of love. Kapag nag-love ka and alam mong hindi mo pa kaya ibagay lahat-lahat, huwag muna. Kapag alam mong ready ka na magbigay ng sobra-sobra,” saysay pa niya.

Mipaambit sab si Martin nga makalingaw gyud ang dagan sa istorya sa maong pelikula tungod kay aduna kini daghang pagbali sa istorya nga dili damhun nga mahitabo sab diay sa tinuod nga kinabuhi.

Gipaneguro usab ni Martin nga dili gyud magmahay ang motan-aw sa maong   pelikula gumikan kay makita niini ang maayo nga artista sa karon nga henerasyon nga sila si Lou Veloso, Kiko Matos, Akihiro Blanco, Elora Españo, Joey Paras, Jojit Lorenzo, Gio Gahol, VJ Mendoza,  ang  Sugbuanon nga si Chai Fonacier.

Dugang pa nga ang maong pelikula adunay  espesyal nga partisipasyon ni Paolo Ballesteros. Ang Born Beautiful ginama kini sa Cignal Entertainment, Octoberian Films ug The IdeaFirst Company.