“Family is Love”

CEBU, Philippines – Quezon City, Philippines- Mga  pakatawa  uban sa hugyaw nga mga sonata maoy nipatigbabaw sa Family Is Love: The 2018 ABS-CBN Christmas Concert nga nahitabo niadtong Martes sa gabii didto sa Smart Araneta Coliseum.

Nagbaha ang kapamilya stars sa maong concert nga nihatag og libre nga kalingawan ngadto sa ilang loyal nga fans.

Dili kini typical nga concert sanglit gisagolan usab kini og paukyab nga production number ug usa na niini ang  pagluwa sa mga bituon sa seryeng Ang Probinsyano nga gipangulohan ni Coco Martin.

Nidalit  si Coco sa sikat kaayo nga “papaya dance” ug gibawsan kini  sa iyang co-stars pinaagi sa pagsayaw og Boomboom nga gipasikat sa Korean girl group nga Momoland.

Matud pa ni Coco nga dako gyud ang iyang pasalamat sa suporta sa masa gumikan kay mao kini ang nag-unang rason  nga nilungtad na og tulo ka tuig ang iyang serye.

Dakong garbo alang kaniya nga makahatag og trabaho sa ubang mga artista.

Giabihan usab og maayo sa Kapamilya concert ang paglugwa sa mga sikat kaayo nga magka-loveteam sa network nga gilangkoban nila ni Kathryn Bernardo ug Daniel Padilla (KathNiel), James Reid ug Nadine Lustre (JaDine) , Liza Soberano ug Enrique Gil (LizQuen).

Gikanta nila ang medley sa mga awit ni Sharon Cuneta.

Base sa nasaksihan sa Banat News Hugyaw, ang KathNiel maoy nakadawat og sipa kaayo nga pakpak gikan sa audience.

Nagdala gyud og mga dagkong banners ang KathNiel fans.

Nagpakilig usab sa mga tawo ang bag-ong magka-love team nga sila si Kisses Delavin ug Donny Pangilinan ingon man usab sila si Maymay Entrata ug  Edward Barber.

Samtang nag-duet sila si Raymart Santiago ug Judy Ann Santos isip tipik sa promosyon sa umaabot nila nga show nga “Starla.”

Wala nagpaulahi sa pag-promote sa iyang show ang aktres nga si Angel Locsin kinsa bida sa upcoming series nga “The General’s Daughter.”

Giubanan si Angel sa entablado sa co-star niya sa maong show nga si Paulo Avelino.

Napuno sa pagpakatawa ang pagtungtung ni Vice Ganda sa entablado kinsa nikomedya nga nahimo na nga SOP ang ASAP human namalhin sa ABS-CBN ang singers nga gikan sa GMA-7.

Todo promote si Vice sa iyang entry sa Metro Manila Film Festival 2018 nga “Fantastika” ug giubanan gyud siya sa entablado sa iyang co-star nga si Richard Guttierez.

Nahugyaw ang katawhan sa dihang nag-duet sila si Sarah Geronimo ug Moira dela Torre sa awit nga “Tagpuan.”

Nidalit pud sa todo nila nga pagbirit sila si  Yeng Constantino , Morissette Amon, Angeline Quinto, Jed Madela, Martin Nievera, Gary Valenciano, John Arcilla, KZ Tandingan, Erik Santos ug Yen Laurel.

Sa katapusang bahin sa Christmas concert , wala usab nagpaulahi sa pagbirit ang Asia’s Songbird nga si Regine Velasquez.

Gipakpakan og maayo ang iyang song number diin naka-duet niya si Bamboo.

Naa pud siya’y special number kauban ang TNT Boys.

Ang usa sa mga dakong opisyal sa ABS-CBN nga si Charo Santos Concio nipadayag nga usa gyud sa angayan hatagan og gibug-aton sa pagsaulog sa Pasko mao ang pagka bililhon sa pamilya.

Ang Christmas Concert sa ABS-CBN i-ere karong December 15 (9:15pm) ug December 16 (8:30pm).