#JustBelieveInYourSelf
Jaypee Pleños Lao (Banat) - November 30, 2018 - 12:00am

CEBU, Philippines – Kinsay magtuo nga gikan sa pagka manikyurista, karon nahimo na siyang usa sa mga nagkasikat nga make-up artist sa Sugbo?

Kini maoy estorya sa kapalaran ni Kris Andrea Barrameda sa kalibutan sa pagpaanyag kinsa make- up artist sulod na sa kapin usa ka dekada.

Bata pa lamang siya, nabantayan na gayud niya ang iyang kaugalingun sa dakong hilig sa pagmake up.

Kasagaran sa iyang mga suod nga higala ug mga kanhi niya magtutudlo sa high school ang nakabantay gyud sa hugyaw niya nga abilidad sa pagpaguwapa .

Aktibo usab siya sa pagsalmot og mga kompetisyon kalabot sa pag make-up.

Dunay mga higayon nga napildi siya apan ang labing importante alang kaniya duna siya’ y nakat-onan nga nagamit gyud niya og maayo sa kasamtangang panahon.

Paghuman niya’g high school, nakahukom siya nga dili na lamang mo tungha sa kolehiyo ug ipadayun na lamang ang iyang ambisyon nga mamahimong make- up artist.

Matud niya sa dihang nagsugod pa lamang siya, dili gyud kini lalim alang kaniya tungod kay pinaagi sa kaugalingon niyang diskarte, kinahanglan pa niyang mangita og paagi arun makapundar og mga gamit sa make-up.

Gikumpisal sab niya nga kaniadto, wala gyud niya makuha ang kinatibuk-ang suporta sa iyang pamilya gumikan kay dili kini uyon sa iyang pagkabayot apan karon, mapasigarbuhon niyang gipaambit nga 100% full support na ang gipakita niini kaniya.

Dako ang iyang kalipay matud pa nga nahimamat niya si Janna Fernan, usa sa inila nga make up artist sa Sugbo.

Sanglit mao man kini ang nag -agni kaniya nga manimpad dinhi sa dakbayan sa Sugbo hinugdan nga nanamilit siya sa pagpuyo sa Dumanjug.

Sa pagkuyog niya ni Janna sa left and right nga make up appointments, didto siya nabaid og maayo ug nahatagan og daghang mga kliyente nga nitabang napud og refer kaniya sa laing kliyente.

Ang maong higayun maoy giisip niyang break nga naghatud kaniya sa iyang nahimutangan karon.

Sa mga nakalabayng mga panahon, nahimo siyang official make-up artist sa local variety show sa ABS-CBN Cebu nga Kapamilya Mas Winner Ka.

Ubay ubay sab nga mga personalidad, beauty queen ug mga artista ang iyang napaanyag sama nilang Dyan Castillejo, Anna Marie Fegi Brown, Janine Berdin, Miss Millennial 2018 Shaila Rebortera ug Binibining Cebu 2018 Steffi Pearson Aberasturi.

Kun duna siya’y dili malimtang kasinatian isip make-up artist, kini mao ang kahigayunan nga nakapaanyag siya sa mga nagkadaiyang influential personalities sa Sugbo nga sa telebisyon lang niya makita kaniadto.

Wala siyay laing gitinguha kun dili ang mahinumduman sa kadaghanan isip approachable nga pagka make up artist.

Dako ang iyang pasalamat sa iyang pamilya nga maoy nahimo niyang inspirasyon ug sa mga tawong mitabang kaniya sa pagkab-ot sa iyang damgo sama nilang Arnela Martinez Tangkay ug Kimberly Yang Garcia.

Mapasigarbuhon sab niyang gipaambit nga gawas sa iyang pagka make- up artist, mo rebond sab siya og buhok, butang nga iyang gikabisihan kung wala siyay make up appointments.

“Self-supporting ra gyud ko. Wa gyud ko nag salig sa suporta sa foreigner o sa laing tawo. Kung unsay naa ko karon, tungod ra gyud ni sa akong pagka make up artist. Tungod sab ani nailado ko ug naka travel ko og lain-laing lugar. Mao nga sa akong mga buotan ug gwapa nga customers, salamat gyud kaayu sa pagsalig sa akong talent. Tungod ninyu, naa ko karon sa akong gibarugan.”

BNH: Sa pagka karon, unsang panahona in demand ang imong make up?

KRIS ANDREA: Party, weddings and events.

BNH: Nganung gihigugma man gyud nimo ang pag make up?

KRIS ANDREA: Tungod ani, nakatabang ko sa akong family ug sa ubang tawo. Labaw sa tanan, damgo sab gyud nako mahimong inila nga make-up artist.

BNH: May mga award na ba ka nga nadawat sa imong pagka make up artist?

KRIS ANDREA: FilHair(Filipino Hair Dressers Association) 33rd Hair and Make-Up Artist Trends 2017; Grand Champion of Bridal Make-Up and 1st Place sa Commercial Make-Up Hosted by Gandang Ricky Reyes.

FASTFACTS

Name:

Kris Andrea Barrameda

Address:

Laguna, Basak, Pardo

Birthdate:

September 25, 1992

Facebook Account:

kris_andrea2010@yahoo.com

Email Add:

krisandreabarrameda@gmail.com

JUSTBELIEVEINYOURSELF
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with