If others can, why can’t i?

CEBU, Philippines — Moabot gyud sa usa ka punto sa matag binuhat nga kun aduna kitay subayon nga dalan paingon sa atong mga tinguha ug damgo sa kinabuhi, aduna gyu’y mga mahimong babag nga maoy makapaubos sa atong kompyansa sa kaugalingon.

Sama nalang sa panghitabo sa kinabuhi sa gikoronahan nga Miss Balamban karong tuiga nga si Alliyah Jarenn Lapuz.

Gisaysay ni Alliyah nga ang babag sa pagkab-ot niya sa iyang mga damgo mao kadtong mga tawo nga wala misalig kun unsa ang iyang mabuhat pinaagi sa iyang mga naangkon nga mga katakus ug sa kaanyag nga anaa kaniya.

“Tinuod nga  daghan ang wala nisalig nako, that they don't think I can do things right. Naabot na pud sa point nga gi-judged ko as if they really knew me. They're judging my whole life just because of a single mistake nga nabuhat nako sauna”, suma pa niya.

Tuod man, wala kini niya panumbalinga tungod kay mas kaila siya sa iyang kaugalingon ug sa kapabilidad nga mahimo niya.

Usa sa makalipay ni Alliyah mao ang pagsalmot og pageants.

Gisugdan niya ang pagrampa sa entablado  niadtong kindergarten pa siya.

Gisalmutan niya ang Little Miss Day Care Bright Child ug midaog siya niini. Apan pipila ka tuig siya nga nipahuway niini ug nagpokus lamang siya sa iyang pagtuon.

Mibalik siya sa pag-apil niadtong high school na siya. Gumikan sa pagdasig sa iyang pamilya ug kang Ariel Ybarra kinsa mao gyud ang kanunay nga naa sa iyang likod .

Sa upat ka tuig, siya ang nahimong gibangga sa nagkadaiyang interschool beauty pageants.

Pag-abot niya sa kolehiyo, nakahukom siya nga tutukan ang iyang pagtuon gumikan kay dili sayon ang iyang kurso nga gikuha nga mao ang BS- Management Accounting sa University of San Jose- Recoletos.

Apan tungod kay dili gyud niya mahimong talikdan ang kalibutan nga makalipay kaniya, nibalik siya sa pageant stage pinaagi sa Miss Balamban 2018.

Matud pa ni Alliyah nga naninguha gyud siya nga makaangkon og pwesto sa maong indigay.

Gani, nagpaubos gyud siya og trainings ug workshops sa usa sa mga pageant enthusiast nga si Hyra Betito.

Bisan og taud-taud na siya nga nawala sa limelight apan gipaningkamutan gyud niya nga makuha niya kun unsa ang bag-o nga pamaagi sa pagpaso ug aron sab nga mosidlak siya sa entablado.

Gitug-an niya nga atol sa maong indigay, nagdagan sa iyang utok ang iyang mga kahadlok.

“That I might trip off and that I might not be able to answer the questions during Q and A”, tug-an pa niya.

Napamatud-an sab gyud nga wala pa gyud siya natay-an tungod kay sa maong indigay, naangkon niya ang korona ug ang titulo nga Miss  Balamban 2018.

“Overwhelmed ug maka- proud gyud kaayo. And I was really looking forward to represent my municipality for the next year's Binibining Cebu”, matud pa niya.

Human nga naangkon ni Alliyah ang korona, napamatud-an niya nga bisan pa man og nahitabo nga nawad-an siya og gana sa pagsalmot og pageant , nibalik rapud siya sa butang nga iyang ganahan.

Luyo sa mga negatibong komento nga iyang nadawat kaniadto, nadasig siya aron mas tarungon pa niya ang iyang mga gimbuhaton sa inadlaw-adlaw nga kinabuhi.  Nahimo usab  kini nga taytayan aron makaalagad siya sa katilingban ilabi na sa mga kalihokan nga nakatabang sa iyang isigkatawo.

Dakong pasalamat ni Alliyah sa tanan nga nagpaluyo sa iyang kadaugan sa Miss Balamban ilabi na sa iyang pamilya ug tanan nga misuporta kaniya.

Dako sab ang iyang pasalamat sa mga tawo nga milamdag kaniya nga bisan sa bati nga kasinatian, aduna gihapoy kahayag nga nag-atang sa unahan nga naghuwat lamang nga sugaton.

Sa istorya ni Alliyah, mao kini pagbalik sa kompyansa ug pagsalig  uban sa mensahe nga kinahanglan nga mosalig  lang gyud sa kaugalingon .