Regine: ABS-CBN ang numero uno!

CEBU, Philippines — Gibutyag sa bag-ong Kapamilya singer Regine Velasquez nga pinahimutang gyud ang pagpanamilit niya sa GMA-7,  gani mapasalamaton siya sa maong network gumikan sa maayong pagdala sa iyang career sulod sa taas nga katuigan.

Sa pagka-karon, gipasigarbo ni Regine nga nakatrabaho na gyud siya  sa nag-unang TV network sa nasud.

“Bago man lang matapos yung career ko, masabi kong nakatrabaho ko din ang number one station,” suma pa ni Regine.

Sa maong pamahayag sa singer, gilat-an siya og nakalain-laing komento sa netizens.

Ang uban niuyon sa iyang mensahe, samtang ang uban niini wala nahimuot.  Wala ra manumbaling si Regine sa komento sa iyang bashers.

Nasayran nga nagpaabot na ang pipila ka mga proyekto ni Regine sa ABS-CBN.

Nagpanikad na ang singer sa paglugwa niya sa ASAP gumikan kay makauban niya si Sarah Geronimo ug ang ubang singers nga nakauban niya kaniadto sa GMA-7.

Duna pud siyay weekly sitcom nga musical ug makauban niya ang iyang bana nga si  Ogie Alcasid ug ang aktor nga si  Ian Veneracion. Himuon usab siya nga hurado sa  Philippine franchise sa  reality show nga American Idol nga paga-ulohan og “Idol Philippines.”

Siya usab ang mokanta sa theme song sa teleseryeng The General’s Daughter nga gibidahan ni Angel Locsin. Komposisyon kini ni  Ogie Alcasid.  Himuon usab siya nga special guest sa  Gandang Gabi, Vice.