‘When Sadness Lingers’

CEBU, Philippines – Talagsaon nga pelikula  nga  mag-promote og mental awareness maoy gikabisihan karon nila ni Slyvia Sanchez ug  Nonie Buencamino.

Ang maong pelikula mag-ulohan og ‘When Sadness Lingers’ ug gisugdan na ang shooting niini kagahapon dinhi  Sugbo.

Gipaluyohan kini sa Save Inc. (Society Awareness Volunteerism Empowerment),  ug mao kini ang labing unang higayon nga ni-produce sila og advocacy film.

Atol sa presscon sa maong pelikula, gipadayag sa line producer niini nga si Anne Angus nga naghitak na karon ang mga balita kalabot sa  resulta sa depresyon ug uban pa nga mental issues.

Matud pa nga dili kini angayan nga baliwaon sanglit bisan kinsa ang mahimong makasugat sa maong sitwasyon.

Magtuki ang maong pelikula sa magtiayon nga duna’y giatubang nga mga pagsulay.Usa na niini ang istorya sa usa ka inahan nga ginganlan og Agnes (Sylvia)  kinsa naghambin sa sakit nga schizophrenia.

“Yung sakit niya, minsan okay siya pakisamahan, minsan naman mawala ang pagka-kalmado niya. Mausab-usab ba.  Pero sa kana nga mga sitwasyon, dapat ato gyud na sila pagasabton. Seguro hatagan gyud natu sila og pansin lalo na sa pagmamahal,” suma pa ni Sylvia kinsa  miangkon nga  usa gyud ka Cebuana hinungdan nga kahibalo siya mobinisaya.

Matud pa ni Sylvia nga sa dihang gi-presenta ngadto niya ang maong proyekto, iyaha gyud kining gitun-an og maayo, sanglit  pipila pud siya ka tuig nga dunay proyekto nga nagdala og bug-at nga emosyon  nga mao ang serye niya kaniadto sa ABS-CBN  nga The Greatest Love, diin nidala pud siya sa karakter sa usa ka inahan nga dunay Alzheimer’s disease.

“Ang tindi ng karakter ko sa The Greatest Love, dito naman sa ‘When Sadness Lingers’, iba yung sakit ko, pero kinakailangan din nang matinding paghahanda. Pero nagustohan ko yung adbokasiya ng mga producer , hindi ko iniisip kung magkano ang kikitain ko dito, yung iniisip ko ay yung magandang advocacy,”matud pa ni Syvia.

Tipik sa iyang pagpangandam ang pag-research og maayo lakip na ang pakighinabi og mga doktor aron makahibalo siya unsaon sa atake sa  iyang karakter.

Samtang ang aktor nga si Nonie niangkon nga aktibo gyud siya sa mga programa nga nag-promote og mental awareness busa wala gyud siya nagduha-duha sa pagdawat sa maong proyekto.

“Yung mental issues ay seryosong bagay,  yung mga tao na nakakaranas ng mga ganyan ay kailangan ng pag-intindi. Hindi natin alam ang pinag-dadaanan nila kaya hindi sila dapat husgaan.  Ang pelikulang ito ay isang daan para naman malamanng mga tao na dapat bigyan ito ng pansin,” saysay pa ni Nonie.

Nidala si Nonie isip bana ni Sylvia sa maong pelikula. Siya si Alfred kinsa makaamgo nga ganahan pud siya og lalaki.

Dili na hinoun bag-o alang kaniya ang gay role apan giisip niya nga hagit sa matag higayon nga makadawat siya sa maong klase nga role.

“Kasi iba-iba yung takbo ng story, at iba-iba din ang atake sa  role nga ginampanan ko. Para mabigyan ko siya ng hustisya, kailangan pag-aralan talaga ang sitwasyon sa story,”  matud pa ni Nonie.

Sa umaabot nga Disyembre, ma-busy usab si Nonie sa mga kaliholkan  kalabot sa mental awareness.

Ang “When Sadness Lingers” gikatakdang ipasalida sa mga sinehan nationwide karong Disyembre ug padayon nga gisabotan ang tukma nga petsa niini.

Suma pa ni Angus nga magsilbi kini nga Christmas gift sa tanang tawo aron makita gyud kung unsa ka improtante ang paghatag og atensyon sa mga tawo nga nagsagobang og mental issues.

“Ang mga tawo nga dunay gihambin nga problema, sama mga tawo nga nag-agi og depresyon, dili gyud na natu sila pasagdan. Ato sila nga hatagan og saktong pagpangga nga  ilaha gyud nga masulod sa ilang huna-huna kung unsa kanindot ang kinabuhi. So kini nga movie kay alang gyud sa tanan, ug daghan gud ang maka-relate niini,” suma pa ni Angus.

Dugang pa ni Angus nga pang-international standard gyud ang pagama sa maong pelikula  ilabi na nga duna silay gikuha nga filmmakers nga gikan sa usa ka film  school.

Malipayon usab niya nga gipahibalo nga puros mga Sugbuanon ang co-stars nila ni Nonie ug Sylvia sa maong pelikula nga ubos sa direkyson nila ni Mike Muschamp ug Marini Fernandez.