Paglikay sa pagamit og plastic

CEBU, Philippines — Sa grabe nga polusyon nga atong nahiaguman karon, angayan na kita nga magbinantayon sa tanan natong mga lihok gumikan kay kung  magpadayon pa kita sa atong pagpasagad, magpadayon sab ang atong pag-antos sa paghiagum sa dili balanse nga dagan sa panahon.

Gani, usa sa atong mga pag-antos mao ang kanunay kita nga mataptan sa sakit tungod sa uwan ug init nga dili gyud nato malikayan.

Usa sab mao ang katalagman nga dili  gyud nato makontrolar.

Atu na usab  sugdan ang atong pagmatngon ug pagmabinantayon, aduna pa kaha kitay kalibutan nga mapuy-an? Ang tubag, aduna pa ug atong padayunon ang pag-amping sa atong kalikupan.

Usa sa dakong pamaagi sa pag-amping sa atong kalikupan mao ang paglikay sa pagamit og plastic o kining mga gitawag natong disposable  utensils sama sa baso, kutsara, tinidor, straw ug plato.

Ang pangutana, mahimo ba nga wala na kitay gamiton nga plastic sa atong inadlaw-adlaw nga pagpanikaysikay?

Well, mao kana ang angayan na natong praktison aron kita maanad na dili na magdepende kanunay sa pagamit sa mga butang nga makahatag og kadaot.

Sama sa gugma, angay nang likayan ang mga butang o ang mga tawo nga makasakit o makadaot kanato gumikan kay sila ang tinubdan kun ngano dili kita hingpit nga malipayon sa atong pagpakabuhi niining atong kalibutan.

Karon, ang LifeWithoutPlastic.com adunay gisugyot nga mga pamaagi aron mas makasalbar pa kita sa atong kalikupan ug aron sab mas makatabang kita sa paglikay o pag-usik sa pagamit og plastic.

1. Kung moadto og tsanggihan, mas maayo og magdala og kaugalingong pamutos sama sa bayong ug net bag. Gani, mas maayo sab nga mao kini ang dad-on kun mag- grocery sa mga supermarket.

2. Magdala og kaugalingon na water bottle aron dili na magsigi og palit og tubig sa gawas, ug pinaagi niini, makadaginot kita  sa plastic container nga gamiton. Gani, ang water container nga gibaligya  makahatag kini og kadautan sa atong lawas ilabi na og mainitan kini.

3. Mas labing maayo magamit og kaugalingong tasa o baso ilabi na  og naa sa opisina aron makalikay sa magtipun-og nga plastic  cups nga ikausa lang magamit.

4. Daghan og rason aron kita makadala og bawn nga pagkaon kun mo-eskwela, molarga ug kun asa man kita mopaingon. Aron makatipid sab sa kwarta sa pagpalit og pagkaon, mas maayo nga bawnon ang salin nga pagkaon o ang mga pagkaon nga giandam ni nanay kun molakaw kita. Mas maayo nga ibutang kini sa limpyo natong bawnanan aron dili na magpangita og lain panaksan nga kasudlan niini kun naa sa gawas sa balay.

5. Sa higayon nga moinum kita og softdrinks, mas labing maayo nga dili na kita mogamit og straw gumikan kay sa makausa lang kini gamiton ug mao sab kini ang klase sa plastic nga kusog mopainit sa atong kalikupan.

6. Sa matag higayon nga mokaon kita sa pampubliko nga lugar, dili na angayan nga maghuwat kita og waiter o tiglimpyo sa  maong kan-anan. Aduna  kitay mga kamot nga mahimo natong mabuhat sa mga trabahante sa usa ka kan-anan. Kun mangaon kita, hinluan inig human og kaon aron dili hugaw tan-awn ang maong kan-anan.

7. Ang mga salin o mga sobrang pagkaon, imbes nga ibutang kini og plastic, mas maayo nga ibutang kini og gamay nga binildo nga botelya .

Kining mga tips nga gisugyot, mamahimo nga ipakatakap kini sa tanan aron uban tang magpalambo ug mag-amping sa atong kalikupan. Angayan natong hinumduman nga ang mahitabo sa umaabot, anaa lang sa atong kamot. Kun kita mohatag og alamag ug magpakabana, mamahimo natong masulbad ang mga problema sa atong katilingban.