Natural uy!
Hugtanong gihimakak ni Jessy Mendiola ang taho nga matud pa nagparetoke siya sa iyang ilong. Suma pa sa aktres nga natural kini ug dili niya i-deny kon ugaling iyaha kining ipausab. Kahinumdoman nga dunay pipila ka netizens ang naintriga sa iyang ilong sa latest photo nga iyang gi-post sa Instagram .
Init nga eksena
Giangkon ni Tom Rodriguez nga dili basta-basta ang init nga niya nga eksena uban nila ni Lovi Poe ug Erich Gonzales sa pelikulang The Significant Other. Lahi kini nga sexy scene kumpara sa iyang nabuhat kaniadto.
Revilla brothers
Gisugdan na ang shooting sa pelikula sa Imus Productions nga gibidahan sa tulo ka mga anak ni Sen. Bong Revilla nga sila si Jolo, Luigi, ug Bryan Revilla. Magtuki sa isyu sa ginadiling drugas ang maong pelikula.
Nakapalit og balay
Duna gyu’y resulta ang pagkugi ni Janella Salvador sa iyang trabaho. Giingong nakapatukod na si Janella og balay alang sa iyang pamilya nga matud pa nagkantidad og dul-an sa P18 million. Nasayran nga wala gyud mabakante ang career sa aktres hinungdan nga nakatigom kini og maayo.
Sagunson ang proyekto
Wala ra maguol si Mike Tan bisan pa man nga gipatay ang iyang karakter sa seryeng Ika-6 Na Utos gumikan kay gihatagan ra siya dayon og follow-up project sa GMA 7. Usa si Mike sa mga bida sa bag-ong serye sa GMA-7 nga Hindi Ko Kayang Iwan Ka nga magsugod na karong February 26.
Maka-duet ang Thai singer
Nagmaya si Maja Salvador gumikan kay siya ang napilian aron maka-duet ang Thai singer nga si ToR Saksit sa kanta nga Falling Into You alang sa latest single niini. “I feel so special of course and lucky kasi pinili nila ako na maging part nitong single na ‘to kasi sila talaga ‘yung kumontak sa Ivory Music and Video so ang swerte ko po at ang ganda ng kanta namin,” saysay pa sa aktres ngadto sa PUSH.
Nabag-ohan
Aminado si Paolo Ballesteros nga duna’y mga eksena sa pelikulang Amnesia Love nga naglisod siya. Hinoun dinhi masukod kung asa kutob ang iyang abilidad sa iyang pagka-aktor. Ang sexy actress nga si Yam Concepcion maoy leading lady ni Paolo sa maong pelikula.
Moarte gihapon
Bisan pa man sa iyang ka-busy sa iyang pagka-direktor, dili gihapon biyaan ni Gina Alajar ang pag-arte. Nalakip ang aktres sa seryeng Hindi Ko Kayang Iwan Ka sa GMA-7. Nasayran nga aktibo si Gina sa iyang pagka-direktor sa nagkadaiyang serye sa GMA-7 sulod na sa pipila ka tuig.
Suki sa pelikula
Nahimo nang suki si KZ Tandingan sa pagkanta sa mga theme song sa pelikula. Kahinumdoman nga si KZ ang nagkanta sa Two Less Lonely People In The World nga maoy theme song sa pelikulang Kita Kita. Siya usab ang nagkanta karon sa Isang Linggong Pag-Ibig nga maoy gigamit sa Sin Island sa Star Cinema . Gikanta usab niya ang Till My Heartache Ends nga theme song sa pelikulang The Significant Other.
Gipaila-ila sa ginikanan
Malipayon si Daniel Matsunaga gumikan kay naila-ila na niya sa personal ang ginikanan sa iyang uyab nga si Karolina Pisarek. Matud pa nga supportive kaayo kini sa relasyon nila ni Karolina nga usa ka modelo.
- Latest