Gibutyag ni Kim Chiu nga ang pagpakatawa maoy sunod niya nga buhaton alang sa sunod niya nga proyekto sa ABS-CBN. Nasayran nga naghinapos na ang serye nila ni Gerald Anderson nga "Ikaw Lang Ang Iibigin" busa nagsugod na siya og pangandam sa iyang follow-up project sa ABS-CBN.
Amnesia Love
Magpares sa pelikula sila si Paolo Ballesteros ug Yam Concepcion. Ang maong proyekto aduna’y tentative title nga Amnesia Love. Pagadalhon ni Paolo ang tawo nga duna’y amnesia ug na-in love kini kang Yam.
Nagbaha ang gastohanan
DIli lalim ang preparasyon nila ni Coleen Garcia ug Billy Crawford sa umaabot nila nga kasal sanglit ilaha pa gyud nga nasingit ang pagpalit og balay. Excited na kaayo ang duha sa espesyal nga adlaw.
Video editor
Si Sam Milby maoy nangunay og edit sa music video sa kanta ni Kyla nga Only Gonna Love You . Kahinumdoman nga si Sam pud ang nag-edit kaniadto sa music video sa kanta ni Moira dela Torre nga Malaya.
Buwag na diay
Gikatahong nagbuwag na sila si Ruru Madrid ug Gabbi Garcia. Hinuon gipabilin gihapon ang ilang panaghigalaay ilabi na karon nga kauban sila sa bag-ong serye sa GMA-7 nga Sherlock Jr.
Mopahiyom ra
Igo ra mopahiyom si Alden Richards kung dunay mosaway kaniya. Suma pa sa aktor nga kinaon na niya ang mga ipangsulti sa iyang bashers busa naanad na siya niini. Ang labing importante nga maayo ang dagan sa iyang career.
Baby brother
Giangkon ni Jake Cuenca nga nidiskarte siya kaniadto kang Alessandra de Rossi. Wala magkadayon ang duha apan wala mahupas ang ilang kasuod. Suma pa ni Alessandra nga “baby brother” ang pagtan-aw niya kang Jake.
Dili manghilabot
Tsika pa ni Gerald Anderson nga dili gyud siya manghilabot sa oras sa trabaho sa iyang girlfriend nga si Bea Alonzo. Suma pa niya nga susama sila nga artista busa nakasabot ra siya sa kahuot sa ilang mga skedyul.
Halimaw ipasalida sa Berlin
Malakip sa Berlin International Film Festival 2018 ang latest film sa award-winning director nga si Lav Diaz nga nag-ulohan og "Ang Panahon ng Halimaw". Ang maong pelikula gibitoonan nila ni Shaina Magdayao, Pinky Amador, Bituin Escalante, Hazel Orencio, Bart Guingona, Joel Saracho, Angel Aquino, Lilit Reyes, Don Melvin Boongaling, Noel Sto. Domingo, ug Ian Lomongo.
Wala mataypi
Giangkon ni Kris Bernal nga na-frustrate gyud siya gumikan kay wala gyud siya kadawat og mga acting award. Usa ka dekada na siya sa showbiz apan wala pa gyud siya makakuha og pasidungog. Suma pa sa aktres nga bisan kinsa nga artista ang nangandoy nga makakuha og award.