Fashionable Friday “Always Love Your Craft”
Jaypee Lao (Banat) - August 24, 2017 - 4:00pm

CEBU, Philippines - Ubay-ubay na nga fashion designers ang mipatigbabaw sa industriya nga ilang gilangkuban.

Gani adunay uban, tungod sa unique nila nga talento, nahimong tinamud dili  lamang dinhi sa nasud apan lakip na sa international scene.

Usa na niini si Harvey Cenit, lumad nga taga Medellin, Cebu nga naa na karon sa Dubai, United Arab Emirates nga maoy tag-iya ug nagdumala sa Al Aroosa Aniqah, usa ka dinumog nga boutique sa Middle East.

Dakong garbo sa mga Sugbuanon si Harvey sanglit hangtud karon, padayun man nga nagsaba saba ang iyang pangalan sa international fashion industry diin nahimamat niya ang pipila sab nga mga nabantug nga designers sa mga nagkadaiyang dapit sa kalibutan.

Gani karong bag-o lang, gipasidunggan siya sa The Filipino Times isip Most Promising Fashion Designer ug giila sab siya sa Illustrado, usa ka magazine didto sa Middle East isip usa sa mga 100 Most Influential Filipinos in the Gulf.

Pipila lamang kini sa mga rekognasyon  nga nadawat niya nga nagtimaan sa iyang kakugi ug ka talented sa natad nga iyang gisudlan.

"As of now dili pa gyud ko kaingon nga nakab-ot na nako ang akong break. Karun nagpadayun pako'g kat-on sa mga butang nga angay makat-onan niini nga field nga akong gipili. Kung mahatagan man gani ko og dako nga break, mas labaw pa gyud nga dili ko kinahanglang mu-undang og kat on,” saysay pa niya.

Gipabuhagay ni Harvey nga ubay-ubay na sab nga mga personalidad sa Pilipinas ang iyang nabuhatan og sinina.

Pipila niini mao silang Mercedes Cabral atul sa pagrampa niya sa Venice Film Festival, Dionne Monsanto sa Star Magic Ball ug sa pagsalmot niini sa Film Festival sa Espanya.

Samtang siya sab ang nagbisti ni Ivy Grace Paredes atol sa pagpanimpad niini sa X-Factor U.K. ug dili sab niya matud pa malimtan ang iyang kasinatian sa dihang siya'y misapot sa banggiitang singer nga si Lea Salonga.

"Hilig na gyud ko'g fashion designing since I was a kid. I dreamt of being a designer. So nikuha ko sa kurso nga fine arts sa University of the Philippines sa Cebu. Pagka graduate nitrabaho ko isip assistant-designer ni Harley Ruedas. Pinaagi niya didto ko nakakat-on sa mga butang nga wala nako nakat-unan sa classroom," pagkompisal ni Harvey sa iyang pagsugod isip fashion designer 13 ka-tuig na ang nakalabay.

Pagpaambit pa niya, mokita gyud siya og dako didto sa U.A.E. o kun Middle East sa panahon nga daghan og kaslon  kay matud niya mogasto gyud og dako ang mga tawo sa maong dapit alang sa wedding gown.

Dugang pa niya, nasinati sab niya kaniadto ang mga nagkadaiyang pagsuway sa kinabuhi una siya nahimutang karon sa iyang istado.

Taod-taod sab siyang nagpaabot sa panahon aron hingpit siyang mailhan sanglit sa kadaghanan sa mga bag-ong usbong nga  designers nga iyang mga kadungan kaniadto lisud gyud nga mo-standout sa kadaghanan.

Apan dinuyugan sa pagpaningkamot ug kakugi, hinay-hinay siyang mipatigbabaw sa fashion scene.

Dugang pa niya, sa matag panahon nga  adunay mga pagsulay nga iyang masugatan,  iyaha  lamang hunahunaon nga ang tanan maagian gyud  kini ug mahiaguman sa tanang designers aron magsilbing leksyon alang kanila.

Ang iyang pamilya ug ang mga tawong adunay dakong pagtuo kaniya ang gihimo niyang inspirasyon niining tanan.

Wala'y gipili nga oras ang pagmugna og mga maanindot nga bisti.

Mao kini ang gipahimug-atan ni Harvey sanglit sa bisag unsang adlaw kon aduna siya'y mga walk-in nga customers, diha-diha dayun siya mo-sketch og design nga mo-swak sa panglasa sa iyang kliyente.

Giangkon niya nga aduna siya'y kaugalingong fashion holy trinity o kun giidolo niya'g maayo ug kini mao sila si Cary Santiago, Michael Cinco ug Elie Saab.

Samtang ang mensahe ni Harvey ngadto sa  aspiring designers  nga dili  gyud malimot sa pag-ampo sa tanang panahon.

"Taste, talent and dedication," mao kini alang kaniya ang lamas nga nagdala kaniya sa iyang nahimutangan karon dinuyugan pa sa iyang pagka-hardworking ug pagka- fighter aron mahatagan og katumanan ang iyang mga damgo.

Q and A

BNH: Gawas sa imong pagka designer, unsa pay gusto nimong makab-ot o mabuhat sa imong kinabuhi?

Harvey: Actually, aside sa ganahan ko magtukod og couture shop sa Cebu, ganahan pud ko magtukod og restaurant.

BNH: Unsay mensahe nimo sa mga kliyente nimo ug sa mga tawong padayun nga misalig sa imong linahi nga talento sa kalibutan sa fashion?

Harvey: Daghan kaayong salamat. Kay kung dili tungod sa inyong pagsalig, maybe nawad-an napud ko'g pagsalig sa akong kaugalingon. Sa akong pamilya ug mga suod nga mga higala, salamat gyud. Ug labi na gayud nilang Cary Santiago ug kang Michael Cinco sa paghatag og pagtagad sa akong talento. Ang ilang pagsalig kanako mao ang akong gasolina para ipadayon nako ang paglakaw sa akoang dalan nga gipili.

BNH: Unsa ang labing dakong leksyon nga imong nakuha  sa imong pagka designer?

Harvey: Daghan kaayo ka'g makat-onan on your way up, pero ang pinakadako gyud nga pirmi nimo dapat ibutang sa imong huna-huna ug kasingkasing kay dedication. Always love your craft. (BANAT NEWS)

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with