CEBU, Philippines – Tsika pa ni Marian Rivera nga bisan busy siya sa pagpangandam sa umaabot nga kasal nila ni Dingdong Dantes, dili gihapon niya sipyaton ang iyang mga fans day sa nagkadaiyang dapit sa Pilipinas karong tuiga. Suma pa sa aktres nga ikalipay niya og maayo kung mahimamat niya ang iyang fans.
Nayayay gihapon
Wala gihapon makagawas si Ai-Ai delas Alas sa hospital. Wala gihapon gibutyag sa komedyanteng aktres ang iyang sakit. Ang 20 anyos niya nga uyab nga si Gerald Sibayan maoy kanunay nga nagbantay kaniya.
Mag-inang Lansangan
Gipadayag ni Direk Perci Intalan nga andam siya mogama og pelikula nga pagabidahan nila ni Nora Aunor ug Ryza Mae Dizon. Aduna kini tentative title nga Mag-inang Lansangan .
Jadine gipistahan sa Twitter
Nahimong trending sa Twitter ang pilot episode sa "Wansapanataym Presents My App Boyfie" niadtong Sabado sa gabii. Mao kini ang labing una nga TV project nila ni Nadine Lustre ug James Reid sa ABS-CBN sukad sila mipirma og kontrata sa maong network. Ang hashtag nga "My App Boyfie Pilot Episode" nahimutang sa 7th spot sa "overall worldwide trending topic list" sa Twitter niadtong gabhiona.
Roxanne suportado ni Will
Gipadayag ni Roxanne Barcelo nga supportive ra ang iyang boyfriend nga si Will Devaughn sa pagrampa niya nga sexy sa mga fashion show ang pag-pose niya sa usa ka sexy magazine. Suma pa ni Roxanne nga masinabtanon ra si Will ilabi na nga susama sila nga artista.
Two Wives
Sila si Kaye Abad , Erich Gonzales ug Jason Abalos maoy mga bida sa local adaptation sa Korean drama series nga "Two Wives" sa ABS-CBN. Nasayran nga ni-click ang maong Korean series sa dihang gisalida kini sa ABS-CBN niadtong 2012.
Sheena ug Rocco mag-uban
Giangkon ni Sheena Halili nga nakugang siya sa dihang gisuginlan siya sa management sa GMA-7 nga iapil siya sa Hiram na Alaala gumikan kay nalakip sa maong serye ang ex-boyfriend niya nga si Rocco Nacino. Giklaro hinuon ni Sheena nga wala siya makulbaan niini sanglit hagbay raman sila nga nagtagad sa iyang kanhi uyab.
Wanted leading man
Si Lovi Poe maoy himoong bida sa remake sa pelikulang Where Love Has Gone sa Regal Films. Nangita pa ang Regal og leading man ni Lovi sa maong pelikula.
Carla nanambok
Mipadayag ang mga kritiko ni Carla Abellana nga matud pa wala'y epekto ang pag-diet sa aktres gumikan kay nanambok na kini. Giingong klaro kaayo nga nidako ang lawas ni Carla sa seryeng My Destiny.
Kathniel aprobado ni Echo
Uyon si Jericho Rosales ngadto nila ni Kathryn Bernardo ug Daniel Padila kinsa mga bida sa remake sa seryeng Pangako Sa 'Yo sa ABS-CBN. "I feel proud na, wow gagawin nila 'yung remake ng Pangako Sa 'Yo, and I really, really hope and I know na maganda naman talaga gumawa ang ABS-CBN," suma pa ni Echo.
Padungog-dungog?
Gipadayag ni Heart Evangelista nga wala siya'y oras sa mga tawo nga dili ganahan kaniya. Gusto sa aktres nga magmalipayon ang iyang kinabuhi busa mouban lang siya sa mga tawo nga nakauyon kaniya. Adunay mga nagduda nga si Marian Rivera maoy gipadungog-dungog ni Heart.
Maglisod gihapon
Giangkon ni Solenn Heussaff nga hangtud karon, maglisod gihapon siya sa paglitok sa pipila ka mga pinulongang Tagalog busa maghuna-huna gyud siya og maayo sa dili pa siya moistorya. "Iniisip ko dalawang beses bago ako magsalita," matud pa ni Solenn.
Nauyonan sa uyab
Malipayon si Shaira Mae gumikan kay nauyonan ra sa iyang boyfriend nga si Edgar Allan Guzman ang ka-loveteam niya nga si Mark Neumann. Magpares sila si Shaira ug Mark sa Wattpad Presents: Mr. Popular Meets Miss Nobody sa TV5.
Nora nagpakaon og lechon
Mibisita si Nora Aunor sa usa ka orphanage sa miaging adlaw didto sa Bulacan. Nangita gyud og lami nga lechon si Nora sa maong dapit aron ipakaon sa mga bata.
Ginama ni Marion
Ang pag-umangkon ni Nora Aunor nga si Marion Aunor maoy nag-compose sa kanta ni Kathryn Bernardo nga "You Don't Know Me" kung diin usa kini sa mga unod sa album sa aktres. Suma pa ni Marion nga nahaom kaayo sa tingog ni Kathryn ang maong kanta.
Gloc-9 bag-o og manager
Gianunsyo ni Gloc-9 nga si Perry Lansigan na sa PPL Entertainment Inc. maoy naghupot sa iyang music career karon.
Kahinumduman nga ang hinigugma niya nga si Thea Pollisco maoy naghupot sa iyang career sulod na sa tulo ka tuig.
Giklaro ni Gloc-9 nga sinabotan nila ni Thea nga magpahupot kang Perry aron makabaton pa og dugang mga opportunidad.
Magpabilin gihapon nga stylist ni Gloc-9 si Thea busa magkauban gihapon sila sa trabaho.
Angeline mitin-aw sa isyu
Gipadayag ni Angeline Quinto nga wala na siya makaantos busa mitingog na siya sa isyu nga matud pa wala siya motagad kang Sarah Geronimo sa dihang nagkaabot sila sa usa ka kalihukan sa showbiz sa miaging semana.
Nakugang si Angeline sa maong istorya ug hugtanon niya kini nga gihimakak.
Suma pa sa singer nga dili kini mahitabo gumikan kay usa ka maayong higala si Sarah ug dako siya og respeto niini ilabi na nga nag-una kini kaniya sa industriya.