Minglanilla mibisbis sa 22 ka tuig nga huwaw sa titulo Misakmit sa unang korona sa Gullas Cup sukad niadtong 2002
CEBU, Philippines — Nakakuha og dugang kusog gikan sa bagang panon sa ilang fans, ang Abante Minglanilla mihimo og usa ka dakong milagro sa second half aron patikangkangon ang Talisay Aksyon Agad, 72-58, sa tinagakay ga duwa sa ilang best-of-three finals aron paglugwa nga kampiyon sa Rhea Gullas Cup 2024 First District of Cebu Inter-City/Municipality Basketball Tournament niadtong Sabado sa gabii didto sa Minglanilla Sports Complex.
Ang Finals MVP nga si JC Rex Sanguenza mipaulbo og 20 puntos uban ang 13 ka rebounds ug lima ka steals sa dihang ang Archangels sa Minglanilla mibisbis sa 22 ka tuig nilang huwaw ning tinuig nga torneyo nga nagpasundayag sa talento sa mga batan-ong basketbolista gikan sa tulo ka mga dakbayan ug tulo ka mga lungsod nga naglangkob sa unang distrito sa Sugbo.
Katapusan nilang nakab-ot ang maong dungog niadto pang 2002.
Sulagma kaayo nga ang ilang head coach niadtong panahona mao si Boyet Velez, nga mibalik sa karaan niyang trabahon aron ituboy ang Minglanilla ngadto sa laing korona, ning higayona isip usa ka establisadong abogado ug konsehal sa lungsod.
"Lipay kaayo ko labi na come from behind ang victory unya in front sa mga supporters. Dako kaayo nga factor ang home crowd kay naka-energize gyud sila sa mga players. Bisan behind mi'g 15 points pero ni-rally mi because of the crowd support," dason pa ni Velez.
Sa wala pa midimdim sa katam-is sa kalamposan, ang Minglanilla nag-agi usa og batoon nga dalan gumikan kay nabiyaan man sila og 15 puntos, 24-39, atol sa halftime.
Apan nadasig sa mainit nga suporta sa ilang mga dumadapig, ang Minglanilla milusad og bagsik kaayong resbak sa pinal nga duha ka kuwarter aron usbon ang dagan sa duwa pabor kanila padung ngadto sa katapusang bahin sa aksiyon.
Sa kinatibuk-an sa second half, gilampaso sa Minglanilla ang Talisay, 48-19, aron pagposte og 14 puntos nga demoliseyon.
"We are the champions!" suwat pa ni Minglanilla Mayor Ravid Enad sa opisyal niyang Facebook page. "Thank you, Archangels! Through you, Minglanillahanons have shown our fighting spirit. Our unity. Our hearts for the game. We found our one, stronger, louder voice. That we don't crouch down in fear of a big challenge. We rally for each other. We are Minglanilla! And our story has just begun."
Sa laing post, si Enad nagkanayon nga ang dalaygong pagbalitok usa ka perpektong imahe sa pagkamalungtaron sa mga Minglanillahanon.
"Way kabutangan sa akong gibati nga garbo ug kalipay, uban sa libo-libong Minglanillahanon nga nitan-aw ug nisinggit sa lanog nga suporta. Salamat sa tanang players, sa coaching staff led by Atty. Boyet, and to every member of our community who played a part in this historic achievement," padayon pa Enad.
"May this victory inspire future generations to dream big and reach for the stars, kay sa ako nang gikaingon, walay imposible basta magkugi!"
Samtang ang Talisay, nga gipangulohan ni mayor Samsam Gullas, mapaubsanon taliwala sa kapakyasan.
"Congratulations to Minglanilla. A come from behind victory just goes to show the resilience and grit Coach Boyet has instilled in their team. Congrats and well deserved," paambit pa ni Gullas.
- Latest
