Heat milusaw sa Nuggets, tabla na
CEBU, Philippines — Wala pakyasa sa Miami Heat ang ilang mga fans human nga nakabawi dayon sila sa kapildihan sa Game 1 batok sa Denver Nuggets pinaagi sa 111-108 nga kadaugan kagahapon sa ilang Game 2 sa NBA Finals.
Impresibo ang duwa nilang Gabe Vincent nga miiskor og 23 points uban nilang Jimmy Butler ug Bam Adebayo nga mitampo og tag 21 points ka usa para sa Miami.
Ang ilang kombinasyon mibalewala sa 41 puntos ni Nikola Jokic sa Nuggets. Sama sa gipaabot, wala pakyasa ni Jokic ang iyang fans nga maninguha sa Game 2, apan nagkuwang gihapon kini.
Sikit kaayo ang duwa sa duha, puli puli lang og labaw apan sa kataposang hunat sa oras nga nahibilin nakaabante ang Heat human sila gibiyaan og 15 puntos first-half.
Naka-rally ang Miami ug gi-outpoint ang Nuggets 36-25 sa final period atubangan sa dul-an 20 mil ka fans sa Nuggets nga mitan-aw sa Ball Arena.
Giselyohan ni Adebayo ang kadaugan sa iyang free-throws sa nahibiling 48.3 segundos. Duna pa untay tsansang makatabla aron mag-overtime ang Nuggest apan wala mosulod ang 3-point shot ni Jamal Murray.
Ang Game 3 sa best-of-seven series mahitabo ugmang adlawa. Ang Heat nagtinguhang makuha ang ilang ikaupat nga NBA championship sa pito ka higayon nilang naabot sa finals.
Samtang ang top seed sa Western Conference nga Denver Nuggets pabiling nangandoy nga mabitbit ang Larry O'Brien championship trophy sa labing unang higayon.
Karon pang tuiga sukad-sukad sa kasaysayan sa Nuggets nga nakasulod sa championship series.—IBM
- Latest
