CEBU, Philippines — Ang mga tadhan nga magduduwa og ahedres sa Sugbo magtakos na sab sa ilang abilidad pinaagi sa Cebu Executives and Professionals Chess Association (CEPCA) Summer Open Chess Tournament nga gikatakda karong Mayo 28 didto sa Robinsons Galleria Cebu.
Miabot ngadto sa P30,000 nga ganting salapi ang iapud-apud sa mga mananaog ning siyam ka hugna nga kompetisyon nga gipasiugdahan sa CEPCA isip kabahin sa selebrasyon sa adlawng natawhan sa presidente nilang si Engr. Jerry Maratas.
Ang makampiyon mobulsa og P5,000, samtang ang mopahiluna sa ikaduha ngadto sa ikalimang dapit makadawat og P3,000, P2,000, P1,500, ug P1,000. Ang 6th-10th mokubra og P700 matag usa, ang 11th-15th mobitbit og P500, samtang ang maapil sa top 20 dunay tag-P300.
Aduna say espesyal nga premyo nga P1,500, P1,000, ug P500 alang sa top Cepcans A, P1,000, P700 ug P500 alang sa top Cepcans B, ug P700, P500, ug P300 alang sa top boys and girls 14-under players.
Samtang ang top female ug seniors (60-above) maka-angkon og P500 matag usa.
Ang rehistrasyon nagkantidad og P100 sa Cepcans/kids/ladies/seniors ug P200 sa regular players.
Ang mga organizers modawat lamang og on-site registration. Kadtong interesado moapil gi-abisohan nga moadto sa binyu sa alas-10 sa buntag kon usa ka oras sa dili pa sugdan ang torneyo.