MANILA, Philippines — Nameligro ang Dallas Mavericks nga matagak sa NBA playoffs human sila gipukan sa Philadelphia 76ers, 116-108, sa NBA kagahapon didto sa Wells Fargo Center sa Philadelphia, Pennsyvannia.
Si Joel Embiid miharos og 25 puntos, siyam ka rebounds ug upat ka assists alang sa Sixers, nga milubong sa Mavs sa katapusang kuwarter, 27-17, aron pakgangon ang tulo ka sagunson nilang pilde.
Midugang si James Harden og 15 puntos ug 12 ka assists samtang si Tyrese Maxey mikadlit og 22 puntos alang sa Sixers nga nagpabiling ikatulo sa Eastern Conference ug seguradong sud na sa playoffs bitbit ang 50-26 rekord.
Apan nagpadayon ang kalbaryo Mavs nga natagak sa ika-11 nga dapit sa West ug nagkahanap ang paglaum nga maka-abante sa postseason uban ang 37-40 nga baraha.
Kini bisan pa man og sila si Luka Doncic ug Kyrie Irving nagkumboya'g 47 puntos.
Misamot pa og kakuyaw ang sitwasyon sa Mavs gumikan kay ang sikit nilang mga karibal nga Los Angeles Lakers ug Oklahoma City Thunder parehong midaog.
Ang Lakers mi-ihaw sa Chicago Bulls, 121-110, ubos sa pagpangu ni Anthony Davis nga mipabuhgagay og 38 puntos, 10 ka rebounds, duha ka steals ug duha ka blocks.
Mikisaw sab si LeBron James bitbit ang 25 puntos alang sa Lakers nga ikawalo karon sa West uban ang tablang 38-38 nga marka.
Sa laing bahin, gi-okupar sa Thunder ang ika-10 nga puwesto sa West human nakaipsot batok sa Detroit Pistons, 107-106.