CEBU, Philippines — Ang Royal Star Trading-Don Bosco College sa Dumaguete milampornas sa Bacolod Tay Tung High School, 95-83, aron langkaton ang kampiyonato sa SM-NBTC Visayas Qualifying Tournament niadtong weekend didto sa Cebu City Sports Institute sa Barangay Sawang Calero.
Sa pagbira nila sa korona, ang Royal Star-Don Bosco makigduyog sa Sacred Heart School-Ateneo de Cebu (SHS-AdC) Magis Eagles ngadto sa National Finals sud ning tuiga didto sa Mall sa Asia Arena in Pasay City.
Salamat sa eksoplosibong salida nilang Jay Stephen Garupil ug Matthew James Jucom.
Si Garupil mipabuto og 35 puntos, 10 ka rebounds, unom ka assists ug tulo ka steals samtang si Jucom midugang og 22 puntos, siyam ka rebounds ug tulo ka assists alang sa Royal Star-Don Bosco, nga wala na mahulga pa sukad sila mi-establisar og komportableng 54-35 nga labaw sa halftime. Si MJ Hendric Vailoces midonar og 11 puntos, 10 ka rebounds ug lima ka assists samtang si Almarlon Winters mitampo og 10 puntos, unom ka rebounds ug duha ka assists alang sa Royal Star-Don Bosco, kansang kinadak-an nga labaw nagbarog sa 21 puntos, 52-31.
Si Dylan Benedict Despi miharos og 29 puntos samtang si Nap Lawrence Aleligay mikadlit og 23 puntos apan nakawang ang ilang paningkamot sa habig sa Tay Tung.